AQSH prezidenti Donald Trampning maxsus vakili Stiven Uitkoff Ukrainada tinchlikka erishish bo‘yicha harakatlar doirasida muhim signal berdi. U Fox News efiridagi chiqishida Ukraina prezidenti Volodimir Zelenskiy va Rossiya prezidenti Vladimir Putin yaqin orada shaxsan uchrashishi ehtimolini istisno qilmasligini aytdi. Uning ta’kidlashicha, AQSH tomonining sa’y-harakatlari hatto yaqin 3 hafta ichida shunday uchrashuvga olib kelishi ham mumkin.
Uitkoffning so‘zlariga ko‘ra, u va Trampning kuyovi Jared Kushner “optimistik kayfiyatda”. Ular ikki tomonga ham takliflar kiritilganini, bu takliflar yaqin haftalar ichida pozitsiyalarni bir-biriga yaqinlashtirishi mumkinligini aytmoqda. Maqsad — rahbarlar darajasidagi muloqotga yo‘l ochish.
Bundan tashqari, Uitkoff ehtimoliy ssenariylardan yana birini ham rad etmadi: agar tinchlik kelishuvi uchun real imkoniyat ko‘rinsa, uch tomonlama — Zelenskiy, Putin va Tramp ishtirokida uchrashuv bo‘lishi mumkin. Ammo u bu yerda bitta shartni ochiq aytdi: Tramp faqat “ishni oxirigacha yetkazib, eng yaxshi natijaga chiqish”ga ishonsa, shunday sammitda qatnashishi mumkin.
Shu bilan birga, Uitkoff Putin bilan bir necha bor shaxsan ko‘rishgani uchun bildirilgan tanqidlarga ham munosabat bildirdi. Uning fikricha, qarshi tomon pozitsiyasini tushunmasdan turib kelishuv tuzib bo‘lmaydi: motivatsiya, maqsad va “qizil chiziqlar”ni aniq bilish zarur. Uitkoff Putin bilan uchrashuvlarda Rossiya rahbari o‘z pozitsiyasini ochiq aytganini ham qo‘shimcha qilgan.
Ukraina tomonidan esa pozitsiya avvaldan ma’lum: Zelenskiy bir necha bor Putin bilan shaxsan uchrashishga tayyorligini bildirgan, biroq Moskvaga borish haqidagi chaqiriqlarni rad etgan va javoban Kiyevga taklif qilgan. Shuningdek, u muzokarachi jamoasiga rahbarlar darajasidagi uchrashuv masalasini Jenevada ko‘tarishni topshirgani haqida ham xabar berilgan.
Qisqasi, Vashington “yaqin haftalarda yaxshi yangiliklar” bo‘lishidan umidvor. Lekin vaziyat shunchaki bayonotlar bilan hal bo‘ladigan darajada emas: oldinda hali ko‘p savol, ko‘p shart va eng muhimi — tomonlarning haqiqiy tayyorligi turadi. Shu sabab ham, agar sammit haqiqatdan yaqinlashsa, u katta ehtimol bilan uzoq muzokaralar, qattiq tortishuvlar va qiyin qarorlar fonida bo‘ladi.
“Zamin”ni Telegramʻda oʻqing!
