Eron Tashqi ishlar vaziri Abbos Aroqchi, AQSH prezidenti Donald Tramp tomonidan va’da qilingan “qutqaruv” amalda fojeali oqibatlarga olib kelayotganini ta’kidladi.
Uning so‘zlariga ko‘ra, ushbu tasvirlarda AQSH va Isroil tomonidan boshlang‘ich maktab bombardimon qilinishi oqibatida halok bo‘lgan 160 nafardan ortiq aybsiz yosh qizaloqlar uchun qazilayotgan qabrlar aks etgan.
«Bu yerda ko‘rib turganingiz — parcha-parcha bo‘lib ketgan jasadlar. Ular begunoh bolalar edi. Janob Tramp va’da qilgan “qutqaruv” aslida aynan shu manzaradan iborat», — dedi vazir.
Shuningdek, u fojealar faqat G‘azo bilan cheklanib qolmayotganini, zo‘ravonlik va qurbonlar soni tobora kengayib borayotganini ta’kidlab, «G‘azodan to Minabgacha bo‘lgan hududlarda begunoh odamlar sovuqqonlik bilan qatl etilmoqda», deya qo‘shimcha qildi.
Aroqchi xalqaro hamjamiyatni ushbu hujumlarga befarq qolmaslikka chaqirib, tinch aholi, ayniqsa bolalar hayotini himoya qilish bo‘yicha zudlik bilan chora ko‘rish zarurligini alohida urg‘uladi.
