Yaqin Sharqdagi urush sabab Dubayda oltin narxlari rekord darajadagi chegirmalar bilan sotilmoqda
Yaqin Sharqdagi keskin vaziyat va Eron atrofidagi harbiy mojarolar Dubay oltin bozoriga jiddiy ta'sir ko'rsatdi. Aviaparvozlar to'xtatilgani va xavfsizlik choralari kuchaytirilgani sababli qimmatbaho metallarni ushbu yirik savdo markazidan olib chiqib ketish imkonsiz bo'lib qoldi. Natijada treyderlar oltinni saqlash xarajatlarini qoplash maqsadida uni jahon bozoridagi narxdan 30 dollargacha arzonroq sotishga majbur bo'lmoqda.
Dubay dunyo bo'ylab oltin eksporti va tranziti bo'yicha eng muhim markazlardan biri hisoblanadi. Biroq mintaqadagi urush tufayli havo hududining yopilishi logistikani izdan chiqardi. Oltin odatda yo'lovchi samolyotlarining yuk bo'limlarida tashilgani bois, qatnovlarning bekor qilinishi yuklarning aeroportlarda qolib ketishiga sabab bo'ldi. Quruqlik orqali tashish esa xavfsizlik xavflari tufayli deyarli amalga oshirilmayapti.
Bu holat oltin yetkazib beriladigan eng yirik bozorlardan biri bo'lgan Hindistonda ham sezila boshladi. Hindistonlik tahlilchilarning ta'kidlashicha, hozircha zaxiralar yetarli bo'lsa-da, agar logistik uzilishlar bir necha oy davom etsa, vaziyat jiddiylashishi mumkin. Bundan tashqari, xomashyo yetkazib berishdagi muammolar tufayli ishlab chiqarish xarajatlari 70 foizgacha oshib ketgan.
Mutaxassislar Yaqin Sharqdagi beqarorlik qimmatbaho metallar savdosiga uzoq muddatli salbiy ta'sir ko'rsatishi mumkinligidan xavotirda. Hozirgi vaqtda oltin narxlarida o'zgaruvchanlik kuzatilayotgan bo'lsa-da, logistikadagi muammolar savdogarlar uchun asosiy bosh og'rig'iga aylanib ulgurdi.
“Zamin”ni Telegramʻda oʻqing!
