The Telegraph keltirgan audioyozuvga ko‘ra, Eronning yangi oliy rahbari Mujtabo Xomanaiy Isroil raketa zarbasidan zo‘rg‘a omon qolgan, uning otasi Ali Xomanaiy esa portlashdan atigi bir necha daqiqa oldin nishonga olingan qarorgohni tark etganidan so‘ng halok bo‘lgan.
Aytilishicha, yozuvda davlat rahbari idorasi protokol xizmati boshlig‘i Mazoher Husseyniyning yuqori martabali ruhoniylar va Islom inqilobi qo‘riqchilari korpusi qo‘mondonlariga yo‘llagan gaplari bor. Sizdirilgan bayonda Husseyniy 28-fevral tongida Mujtabo Xomanaiy otasi bilan bir majmuada, rafiqasi va o‘g‘li bilan birga bo‘lganini aytadi. Portlashdan sal oldin u bir ish bilan hovliga chiqqani va raketa binoga urilgan paytda tashqarida bo‘lgani aytilmoqda.
“U bir yumush bilan hovliga chiqqan, ochiq joyda turib yuqoriga qarayotgan paytda raketa binoga urilgan”, degan emish Husseyniy yozuvda. Uning qo‘shimcha qilishicha, Mujtabo Xomanaiy portlashda oyog‘idan yengil jarohat olgan. Xuddi shu bayonga ko‘ra, hujum muvofiqlashtirilgan bo‘lib, idora majmuasining bir necha qismlari bir vaqtning o‘zida nishonga olingan, bu esa operatsiya Xomanaiy oilasining bir nechta a’zolarini yo‘q qilishga qaratilgan bo‘lishi mumkinligini ko‘rsatadi.
Xabar qilinayotgan sizdirish yangi rahbarning jismoniy holati va uning boshqaruv qobiliyati borasidagi taxminlar kuchaygan bir paytda paydo bo‘ldi. Urush boshlanganidan beri Mujtabo Xomanaiy jamoatchilik oldida ko‘rinish bermagan. Ikki hafta ichidagi ilk bayonoti faqat yozma shaklda e’lon qilindi, bu esa uning jarohatlari qanchalik og‘ir ekani va hokimiyatni to‘liq amalga oshirishga qodirmi-yo‘qmi degan savollarni kuchaytirdi.
AQSH mudofaa vaziri Pit Hegset Mujtabo Xomanaiy portlashda yaralanganini va uning tashqi ko‘rinishiga ham sezilarli zarar yetgan bo‘lishi mumkinligini aytdi. Eron tashqi ishlar vaziri Abbos Aroqchi bunday taxminlarni rad etib, yangi oliy rahbar sog‘-salomat ekani va vaziyat ustidan to‘liq nazoratni saqlab turganini bildirdi.
Bu xabar allaqachon beqaror bo‘lgan mintaqaviy inqirozga yana bir noaniqlik qatlamini qo‘shadi. Aytilishicha, Vashington u haqidagi ma’lumot uchun 10 million dollargacha mukofot taklif qilgan, bu esa mamlakatning eng qudratli arboblaridan biri go‘yoki halok bo‘lgan zarbadan keyin Eron rahbariyatiga xalqaro e’tibor qaratilganini ko‘rsatadi.
“Zamin”ni Telegramʻda oʻqing!
