Isroilning Ynet nashri 24 mart kuni Eron tashqi ishlar vaziri Abbos Aroqchi AQSh elchisi Stiv Uitkoffga Eronning yangi oliy rahbari Mojtaba Xomanaiy Vashington bilan muloqotni ma'qullaganini aytganini xabar qildi. Eronlik amaldorga tayanilgan xabarda, agar Tehronning talablari bajarilsa, muzokaralar tezda oldinga siljishi mumkinligi aytildi. Bu ma'lumot Eron tomonidan rasman tasdiqlanmadi. Bu haqda Dw.com xabar beradi.
Bu da'vo ikki tomonning bir-biriga zid ochiq bayonotlari fonida yangramoqda. Avvalroq AQSh prezidenti Donald Tramp Vashington o'zi hurmatli va vazmin deb ta'riflagan nomi oshkor etilmagan eronlik shaxs bilan aloqada bo'lganini aytdi. U, shuningdek, tomonlar bo'lajak ehtimoliy kelishuvning qariyb 15 bandi bo'yicha dastlabki tushunchaga erishganini bildirdi. Biroq Tramp Mojtaba Xomanaiyni nazarda tutmayotganini aytdi.
Boshqa xabarlarda Eron parlamenti spikeri Muhammad Boqir G'olibof ehtimoliy muloqot vakili sifatida tilga olindi. Axios Isroil manbalariga tayanib, vositachilar Islomobodda AQShning yuqori martabali amaldorlari ishtirok etishi mumkin bo'lgan uchrashuvni tayyorlayotganini yozdi. Ammo G'olibof har qanday muzokarani rad etib, bu xabarlarni moliya va neft bozorlarini manipulyatsiya qilishga qaratilgan soxta yangilik deb atadi.
Eron Tashqi ishlar vazirligi matbuot kotibi ham 28-fevraldan keyin Qo'shma Shtatlar bilan muzokaralar bo'lgani haqidagi xabarlarni rad etdi va Tehron vositachi davlatlar orqali yetkazilgan xabarlarga javob bermaganini aytdi. Bu inkorlar Eron, Qo'shma Shtatlar va Isroil o'rtasidagi janglar mintaqaviy beqarorlikni kuchaytirayotgan va haqiqatda biror diplomatik kanal ochiqmi-yo'qmi degan noaniqlik saqlanib qolayotgan bir paytda yangramoqda.
“Zamin”ni Telegramʻda oʻqing!
