Jahon miqyosidagi siyosiy voqealar fonida Nepalda keskin vaziyat yuzaga keldi. Mamlakatning sobiq bosh vaziri Sharma Oli ommaviy namoyishlarni shafqatsiz bostirishga aloqadorlikda gumon qilinib, huquqni muhofaza qiluvchi organlar tomonidan hibsga olindi. Bu voqea nafaqat Nepal jamoatchiligi, balki xalqaro hamjamiyat e’tiborini ham o‘ziga tortmoqda.
Ma’lum bo‘lishicha, 2025 yilda bo‘lib o‘tgan va “Z avlodi namoyishlari” nomi bilan tilga olingan ommaviy chiqishlar mamlakat tarixidagi eng keskin norozilik harakatlaridan biri bo‘lgan. Ijtimoiy tarmoqlarga joriy etilgan cheklovlar, korrupsiyaga qarshi noroziliklar hamda og‘ir iqtisodiy sharoitlar ushbu namoyishlarni yanada kuchaytirgan.
Sentyabr oyida avj olgan tartibsizliklar chog‘ida 70 nafardan ortiq inson halok bo‘lgani qayd etilgan. Eng alamli jihati shundaki, qurbonlarning katta qismi politsiya tomonidan o‘qqa tutilgani haqida ma’lumotlar bor. Bu holat esa jamoatchilik orasida keskin tanqid va noroziliklarni keltirib chiqargan.
Sobiq bosh vazir bilan bir qatorda mamlakatning sobiq ichki ishlar vaziri Ramesh Lekhak ham qo‘lga olingan. Huquq-tartibot organlari bu ish bo‘yicha tergov harakatlari qonun doirasida davom ettirilishini ta’kidlamoqda.
Qizig‘i shundaki, ushbu voqealardan bir kun oldin Nepalda yangi bosh vazir — 35 yoshli repper Balen Shoh rasman qasamyod qabul qilgan edi. Bu esa mamlakat siyosiy hayotida yangi bosqich boshlanganini anglatadi.
Politsiya vakillarining France Press agentligiga ma’lum qilishicha, “ular ertalab hibsga olindi va barcha jarayonlar amaldagi qonunchilik asosida davom ettiriladi”.
Ayni paytda Sharma Oli o‘ziga qo‘yilayotgan ayblovlarni mutlaqo rad etmoqda. Uning advokatlari Reuters agentligiga bergan bayonotida, mijozlarining tergovning bu bosqichida hibsga olinishi asossiz ekanini ta’kidlagan.
Nepalning yangi ichki ishlar vaziri Sudan Gurung esa ushbu hibslarni qo‘llab-quvvatlab, bu qarorni adolat sari tashlangan muhim qadam sifatida baholadi. U Instagram sahifasida: “Hech kim qonundan ustun emas. Bu kimdandir qasos olish emas, balki adolatning boshlanishidir”, — deya yozdi.
Qisqasi, Nepaldagi bu voqealar mamlakatda siyosiy muhit yanada keskinlashishi mumkinligidan darak bermoqda. Keyingi jarayonlar nafaqat ichki siyosat, balki mintaqaviy barqarorlikka ham ta’sir o‘tkazishi ehtimoldan xoli emas.
“Zamin”ni Telegramʻda oʻqing!
