AQSH prezidenti Donald Tramp 1 aprel kuni Britaniyaning “The Telegraph” nashriga bergan intervyusida mamlakatning NATOdan chiqishi ehtimolini jiddiy tarzda ko‘rib chiqayotganini maʼlum qildi. Uning fikricha, alyansga aʼzo davlatlar AQSH va Isroilni Eronga qarshi ehtimoliy harbiy harakatlarda qo‘llab-quvvatlashdan bosh tortgani vaziyatni keskinlashtirgan.
Jurnalistlar bilan muloqot chog‘ida Tramp NATOni “qog‘ozdagi yo‘lbars” deb atab, uning samaradorligiga shubha bildirdi. “Bu masala muhokamaga arzimaydigan emas. NATO hech qachon meni hayratlantirmagan. Men uni doimo qog‘ozdagi kuch deb bilganman. Buni hatto Putin ham yaxshi tushunadi”, — dedi u.
Trampning taʼkidlashicha, NATO davlatlari Eron tomonidan yopilgan Ho‘rmuz bo‘g‘ozini qayta ochish bo‘yicha operatsiyada qatnashishdan bosh tortgan. Ushbu strategik bo‘g‘oz orqali jahon neftining qariyb 20 foizi tashilishi hisobga olinsa, masalaning ahamiyati yana-da ortishi aniq.
Prezident ittifoqchilarni tanqid qilib, ularning bunday vaziyatda faollik ko‘rsatmaganini qayd etdi: “Ular u yerda yo‘q edi. Bu avtomatik tarzda amalga oshirilishi kerak edi. Men bu yerda savdo yoki kelishuv haqida gapirayotganim yo‘q — bu tabiiy burch”, — dedi u.
Shuningdek, Tramp Ukraina ham ushbu operatsiyada ishtirok etishi kerak edi, degan fikrni ilgari surdi. Uning so‘zlariga ko‘ra, AQSH Kiyevga katta yordam ko‘rsatgan, ammo javoban yetarlicha qo‘llab-quvvatlov olmagan.
Bundan avval AQSH davlat kotibi Marko Rubio ham NATO bilan munosabatlarni qayta ko‘rib chiqish zarurligini taʼkidlagan edi. Uning fikricha, agar alyans faqat Yevropa manfaatlari uchun xizmat qilsa va AQSH manfaatlari eʼtibordan chetda qolsa, bunday hamkorlik samarasiz bo‘lishi mumkin.
Intervyu davomida Tramp Britaniya bosh vaziri Kir Starmerni ham tanqid qilib, uning Ho‘rmuz bo‘g‘oziga harbiy kuch yuborishdan bosh tortganini keskin baholadi. Shu bilan birga, u Britaniya harbiy salohiyati haqida ham tanqidiy fikrlar bildirib o‘tdi.
O‘z navbatida, Kir Starmer bu bayonotlarga javoban mamlakat milliy manfaatlardan kelib chiqqan holda mustaqil qaror qabul qilishini taʼkidladi. Uning aytishicha, hozirgi global beqarorlik sharoitida Yevropa davlatlari bilan mudofaa, xavfsizlik va iqtisodiy hamkorlikni kuchaytirish Britaniya uchun ustuvor vazifa bo‘lib qolmoqda.
Umuman olganda, Trampning bu bayonotlari xalqaro siyosiy maydonda yangi muhokamalarga sabab bo‘lib, NATOning kelajagi va AQSHning global strategiyasi haqidagi savollarni yana-da dolzarb qildi.
“Zamin”ni Telegramʻda oʻqing!
