Bugun, 8 aprel kuni Isroil Mudofaa kuchlari (SAXAL) Eron hududiga zarbalar berish to‘xtatilganini rasman e’lon qildi. Shu bilan birga, Livan hududidagi “Hizbulloh” guruhiga qarshi harbiy harakatlar davom ettirilishi ma’lum qilindi.
SAXAL matbuot xizmati tomonidan tarqatilgan rasmiy bayonotda qayd etilishicha, qaror siyosiy rahbariyat topshirig‘i asosida qabul qilingan. Unga ko‘ra, Isroil tomoni Eron yo‘nalishida o‘t ochishni to‘xtatgan bo‘lsa-da, har qanday tahdid yoki qoidabuzarlikka zudlik bilan javob qaytarishga tayyor turibdi.
Bundan tashqari, Livan hududida “Hizbulloh”ga qarshi nishonli quruqlik operatsiyalari izchil davom etmoqda. Harbiylar vaziyatni muntazam ravishda tahlil qilib borayotgani, zarurat tug‘ilganda qo‘shimcha choralar ko‘rilishi ham ta’kidlangan.
Frontorti qo‘mondonligi esa xavfsizlik holatini doimiy nazorat ostida ushlab turibdi. Mudofaa choralariga oid har qanday yangiliklar yuzaga kelganda, jamoatchilikka tezkor ravishda yetkazilishi bildirilgan.
Shuningdek, mamlakat fuqarolariga rasmiy ko‘rsatmalarga qat’iy amal qilish, ehtiyot choralarini susaytirmaslik tavsiya etilgan.
“Zamin”ni Telegramʻda oʻqing!
