25 aprel, shanba oqshomida AQShdagi Hilton mehmonxonasida sodir boʻlgan otishma holati katta shov-shuvga sabab boʻldi. Oʻsha paytda binoda anʼanaviy tarzda oʻtkaziladigan Oq uy muxbirlari assotsiatsiyasining kechki tadbiri boʻlib oʻtayotgan edi va unda yuqori martabali amaldorlar ham ishtirok etayotgandi.
Dastlabki maʼlumotlarga koʻra, qurollangan shaxs xavfsizlik nazorati punktini buzib oʻtib, xodimlarga qarata oʻq uzgan. Videokuzatuv tasvirlarida uning tez harakatda nazorat hududidan oʻtib ketgani va bir lahza xavfsizlik xodimlarini sarosimaga solgani aks etgan.
FQB vakillarining bildirishicha, hujumchi Maxfiy xizmat agentiga oʻq uzgan. Baxtga qarshi, ofitserni oʻq oʻtkazmaydigan jilet himoya qilgan va uning ahvoli barqaror deb baholanmoqda.
Otishma ovozlari yangrashi bilan tadbir darhol toʻxtatildi. Zaldagi 2600 ga yaqin ishtirokchi panoh izlab, har kim oʻzini xavfsiz joyga oldi. Xavfsizlik kuchlari yuqori martabali amaldorlarni, jumladan Marko Rubio, Robert F. Kennedi va Dag Bergumni yerga yotqizib, himoyaga oldi.
Shu bilan birga, Donald Tramp va uning rafiqasi Maxfiy xizmat xodimlari tomonidan tezkor ravishda evakuatsiya qilindi. Manbalarga koʻra, Tramp bir muddat sahna ortida qolgan va vaziyatni nazorat qilishga harakat qilgan.
Gumonlanuvchi ushlangan / Foto: Reuters
Hujumchi tez orada qoʻlga olindi. Rasmiylar uning yolgʻiz harakat qilganini taxmin qilmoqda. Keyinchalik Donald Tramp jurnalistlar oldida chiqish qilib, hujum bartaraf etilganini va barcha rasmiylar xavfsiz ekanini maʼlum qildi.
«Bir kishi bir nechta qurol bilan qurollangan holda xavfsizlik nazorat punktiga bostirib kirdi va u Maxfiy xizmatning baʼzi juda jasur aʼzolari tomonidan zararsizlantirildi», dedi Tramp hodisadan keyin Oq uyda oʻtkazilgan matbuot anjumanida.
«Bilasizmi, u taxminan 45 metr masofadan bostirib keldi, shuning uchun u zaldan juda uzoqda edi. U harakatda edi. U haqiqatan ham tez harakat qilayotgan edi», dedi Tramp tantanali kechki ovqat bekor qilinganidan keyin.
Hozirda hodisa yuzasidan tergov harakatlari davom etmoqda. Shu bilan birga, bekor qilingan tadbirni qayta tashkil etish rejasi ham koʻrib chiqilayotgani aytilmoqda.
Qisqacha aytganda, bu voqea xavfsizlik tizimi qay darajada muhim ekanini yana bir bor koʻrsatdi. Bir necha soniyalik hujum katta fojiaga aylanishi mumkin edi, ammo tezkor harakatlar orqali vaziyat nazoratga olindi.
