Yevropada soʻnggi yillarda kuzatilayotgan kuchli issiqlik toʻlqinlari insonlar oʻlimi sonining ortishiga sabab boʻlmoqda.
The Lancet jurnalida eʼlon qilingan tadqiqotga koʻra, koʻplab hududlarda bu koʻrsatkich 1990 yillarga nisbatan ancha yuqori darajaga yetgan.
Tadqiqot natijalariga koʻra, Yevropa hududlarining 99,6 foizida 2015–2024 yillardagi issiqlik davrlarida oʻlimlar soni 1991–2000 yillar bilan taqqoslaganda oshgan.
Oʻrtacha hisobda har bir million aholiga yiliga 52 ta qoʻshimcha oʻlim holati qayd etilgan.
Ayrim davlatlarda, jumladan Ispaniya, Italiya, Gretsiya va Bolgariyaning ayrim hududlarida bu koʻrsatkich million aholiga 120 tadan oshgan.
Mutaxassislar taʼkidlashicha, issiqlik haqida ogohlantirishlar soni ham sezilarli darajada koʻpaygan.
Jumladan, 1990 yillarga nisbatan bu koʻrsatkich oʻrtacha 318 foizga oshgan boʻlsa, Germaniyada 450 foizgacha oʻsish qayd etilgan.
Olimlar ushbu oʻzgarishlarni global iqlim oʻzgarishi bilan bogʻlab, uning inson salomatligiga jiddiy taʼsir koʻrsatayotganini taʼkidlamoqda.
Shu bilan birga, bahorning ertaroq kelishi allergiya mavsumlarini ilgarilashtiradi va aholi salomatligiga qoʻshimcha bosim yuklamoqda.
Tadqiqotlarda Yevropa hududlarida tropik kasalliklar tarqalish xavfi ham ortib borayotgani qayd etilgan.
Xususan, chivin orqali yuqadigan infeksiyalar, jumladan denge virusi tarqalish ehtimoli taxminan 300 foizga oshgani aytilmoqda.
“Zamin”ni Telegramʻda oʻqing!
