Rossiyada Telegram messenjeri atrofidagi vaziyat yanada murakkablashmoqda. Ommaviy axborot vositalari tarqatgan ma’lumotlarga ko‘ra, so‘nggi ikki oy ichida platformani tark etgan rossiyalik foydalanuvchilar soni 40 million nafarga yetgan.
Bu haqda «Mash» telegram-kanali xabar tarqatdi. Manbaga ko‘ra, messenjer blokirovka qilinganidan keyin Telegram'dan foydalanish darajasi keskin pasaygan.
Mualliflar ta’kidlashicha, may oyi boshlarida messenjerning barqaror ishlashi jiddiy ravishda yomonlashgan. Agar avval xizmat ishlash ko‘rsatkichi 98 foiz atrofida bo‘lgan bo‘lsa, keyinchalik bu raqam 13 foizgacha tushib ketgan.
Shu bilan birga, hatto VPN xizmatlari orqali ham messenjerdan foydalanish qiyinlashgani aytilmoqda. Sabab sifatida blokirovkalarni chetlab o‘tishga yordam beruvchi shlyuzlar va serverlarga qarshi cheklovlar kuchaytirilgani ko‘rsatilmoqda.
Tahlilchilar ma’lumotlariga ko‘ra, Telegram uchun eng og‘ir kunlardan biri 2026 yil 20 mart sanasi bo‘lgan. O‘sha paytda VPN xizmatisiz messenjerga kira olgan foydalanuvchilar soni to‘rt baravarga qisqargani qayd etilgan.
Aprel oyining o‘rtalariga kelib esa bepul VPN xizmatlari orqali Telegram'dan foydalanish deyarli to‘xtab qolgan.
Axborot texnologiyalari sohasi mutaxassisi Konstantin Sestrichkin «Gazeta.Ru» nashriga bergan izohida, messenjer Rossiyadagi kuchli blokirovkalarni chetlab o‘tish uchun yetarli texnik resurs va imkoniyatlarga ega emasligini ta’kidlagan.
Eslatib o‘tamiz, Rossiyada Telegram'ga qarshi cheklovlar messenjer ma’muriyati mahalliy qonunchilik talablarini bajarmagani bilan izohlangan. Xususan, shaxsiy ma’lumotlar xavfsizligi va davlat idoralari talablariga rioya qilish masalalari asosiy bahs mavzusiga aylangan edi.
Mutaxassislar fikricha, agar cheklovlar shu tarzda davom etsa, Rossiyadagi raqamli kommunikatsiya bozorida jiddiy o‘zgarishlar yuz berishi mumkin. Chunki Telegram nafaqat oddiy muloqot vositasi, balki biznes, axborot va media platformasi sifatida ham keng qo‘llanib kelayotgan edi.
“Zamin”ni Telegramʻda oʻqing!
