Xorvatiya prezidenti Zoran Milanovich Isroilning Zagrebdagi yangi elchisi nomzodini tasdiqlashdan bosh tortdi. Ma’lum qilinishicha, bunday qaror amaldagi Isroil hukumati olib borayotgan siyosat, xususan, G‘azo sektoridagi harbiy harakatlar fonida qabul qilingan.
Xorvatiya prezidenti ma’muriyati bayonotida Isroil tomoni taklif qilgan elchi nomzodi Milanovich roziligini olmagani va bundan keyin ham olmasligi aniq ta’kidlandi.
“Isroil Davlatining taklif etilgan elchisi respublika prezidenti Zoran Milanovichning roziligini olmadi va olmaydi”, — deyiladi bayonotda.
Milanovich avval ham Isroilning G‘azo sektoridagi harbiy operatsiyalarini bir necha bor tanqid qilgan. Aytilishicha, u shu vaqtgacha diplomatik amaliyot talablarini inobatga olib, ushbu masala yuzasidan ommaviy ravishda keskin izoh berishdan tiyilib kelgan.
Biroq Xorvatiya prezidenti fikricha, Isroil tomoni Zagrebga yangi elchi nomzodini Xorvatiyaning rasmiy roziligini olmasdan e’lon qilgan. U buni diplomatik munosabatlardagi “yozilmagan qoida” buzilishi sifatida baholagan.
Isroil Tashqi ishlar vazirligi esa Zagrebdagi yangi elchi maqomi bilan bog‘liq masalani hal qilish uchun xorvatiyalik hamkorlar bilan ish olib borilayotganini ma’lum qilgan.
Xorvatiya va Isroil o‘rtasidagi diplomatik munosabatlar Yaqin Sharqdagi keskin vaziyat, ayniqsa G‘azodagi harbiy harakatlar fonida tarangligicha qolmoqda. Bu holat ikki davlat o‘rtasidagi rasmiy muloqotga ham ta’sir ko‘rsatayotgani ko‘rinmoqda.
Eslatib o‘tamiz, fevral oyida Zoran Milanovich xorvat harbiylari xalqaro gumanitar huquqning “qabul qilib bo‘lmaydigan harakatlar va misli ko‘rilmagan buzilishi” sababli Isroil armiyasi bilan hamkorlik qilmasligini aytgan edi.
Qisqasi, Xorvatiya prezidenti Isroil elchisi nomzodini tasdiqlamaslik orqali o‘z siyosiy pozitsiyasini ochiq namoyon qildi. Bu qaror diplomatik protokoldan tashqari, G‘azodagi vaziyatga nisbatan munosabat sifatida ham qabul qilinmoqda. Ya’ni Zagrebdan signal aniq: rasmiy roziliksiz diplomatik qadam tashlash oson hazm qilinmaydi.
“Zamin”ni Telegramʻda oʻqing!
