Zelenskiy Rossiya bilan muzokaralar natijalarini baholadi

^{Foto: «TASS»}
Rossiya bilan muzokaralar davomida Ukraina xohlagan natijaga erishish imkoni boʻlmadi. Bu haqda Ukraina prezidenti Vladimir Zelenskiy Telegram-kanali orqali yoʻllagan murojaatida ma'lum qildi.

«Hozircha biz erishmoqchi boʻlgan natijamizni olganimiz yoʻq», — deydi u.

Shu bilan birga, uning ta'kidlashicha, muzokaralarda Rossiya tomoni oʻz pozitsiyasini e'lon qilgan, Ukraina esa «urushni yakunlash boʻyicha» talablarini ilgari surgan. «Rossiya tomonining ayrim signallarini biz oldik», — deya qoʻshimcha qiladi Zelenskiy.

Ukraina va Rossiya delegatsiyasining maxsus operatsiyalar boshlanganidan keyingi birinchi uchrashuvi 28 fevral kuni Belarusning Gomel viloyatida boʻlib oʻtdi. Xavfsizlik nuqtai nazaridan uchrashuvning aniq joyi oshkor etilmadi.

Muzokaralarda Rossiya tomonidan sobiq madaniyat vaziri Vladimir Medinskiy, mudofaa vaziri oʻrinbosari Aleksandr Fomin, Rossiya Davlat dumasining xalqaro ishlar boʻyicha qoʻmitasi rahbari Leonid Sluskiy va Rossiyaning Belarusdagi elchisi Boris Grizlov ishtirok etdi.

Ukraina tomonidan esa muzokaralarda mudofaa vaziri Aleksey Reznikov, «Xalq noibi» partiyasi vakili David Araxamiya, prezident ofisi rahbarining maslahatchisi Mixail Podolyak, TIV rahbari oʻrinbosari Nikolay Tochiskiy, Kiev delegatsiyasi rahbarining uch tomonlama aloqa guruhidagi birinchi oʻrinbosari Andrey Kostin va xalq deputati Rustem Umerov qatnashdi.

Muzokaralar, taxminan, besh soat davom etdi. Podolyakning soʻzlariga koʻra, muhokamalarning asosiy mavzusi oʻt ochishni va Ukrainadagi harbiy harakatlarni toʻxtatishga qaratilgan. “Zamin” yangiliklarini “Telegram”da kuzatib boring