Polsha Ukrainaga qiruvchi samolyotlar etkazib berishi mumkin

Polsha AQShdan Gʻ-16 qiruvchi samolyotlari evaziga Ukrainaga MiG-29 qiruvchi va Su-25 hujumchi samolyotlarini berishi mumkin. Bu haqda shanba kuni The Wall Street Journal AQSh ma'muriyatidagi manbalarga tayanib xabar bergan.

Nashrning ta'kidlashicha, prezident Vladimir Zelenskiy shanba kuni AQSh Kongressi a'zolariga Ukrainaga harbiy samolyotlar etkazib berishni osonlashtirishni soʻrab murojaat qilgan. The Wall Street Journal manbalariga koʻra, Qoʻshma Shtatlar Polsha Kievga ma'lum miqdordagi MiG-29 va Su-25 samolyotlarini taqdim etish variantini koʻrib chiqmoqda va Qoʻshma Shtatlarda ishlab chiqarilgan qiruvchilar Varshavaga topshirilishi mumkin. Nashrda jangovar samolyotlar soniga aniqlik kiritilmagan.

Gazetaning qayd etishicha, taklif qilingan kelishuv AQSh va uning NATOdagi hamkorlari oʻrtasida muhokama qilinmoqda. Bunday uskunalar almashinuvi Vashington va Varshava rahbariyati tomonidan tasdiqlanishi kerak, deb yozadi The Wall Street Journal.

Avvalroq Zelenskiy NATOdan Ukraina uzra parvozlarni taqiqlovchi hudud joriy etishni soʻragan edi. Shu bilan birga, shanba kuni Rossiya prezidenti Vladimir Putin Rossiya boshqa davlatlarning Ukraina uzra uchish taqiqlangan hududni tashkil etishga urinishlarini harbiy harakatlarda ishtirok etish deb hisoblashi, bu butun dunyo uchun halokatli oqibatlarga olib kelishi haqida ogohlantirdi. AQSh va NATO vakillari avvalroq Ukraina uzra parvozlarni taqiqlovchi hududning joriy etilishi Rossiya bilan urush xavfini tugʻdirishini ta'kidlagan edi. “Zamin” yangiliklarini “Telegram”da kuzatib boring