Osiyodagi eng tajovuzkor ayiq

Hindiston, Nepal va Shri-Lankada uchraydigan labli ayiq Osiyodagi eng tajovuzkor yovvoyi hayvonlardan biri sanaladi. Uzun tirnoqlari va o‘tkir tishlari bilan u nafaqat yo‘lbars, balki insonlarga ham hujum qilishi mumkin. 1950–2019-yillarda qayd etilgan 1 337 ta yirik yirtqich hujumlarining eng ko‘pi aynan shu turga to‘g‘ri keladi.

Asosan meva va chumoli bilan oziqlanadigan bu ayiq tahdid sezsa, darhol hujumga o‘tadi. Bu mudofaa strategiyasi asosan yo‘lbars, sher va leoparddan himoyalanish uchun shakllangan. Inson bilan to‘qnashuvlarda esa ko‘pincha og‘ir jarohatlar yuz beradi.

Labli ayiq soni tabiiy yashash joylarining qisqarishi va odamlarning qasos hujumlari sabab kamaymoqda. Dunyo bo‘yicha ularning soni 20 mingdan kam bo‘lib, Xalqaro Qizil ro‘yxatda “zaif tur” sifatida keltirilgan.

Gujarat va Maharashtra shtatlarida odamlar o‘rmonlarga yoqilg‘i, meva yoki dorivor o‘simlik yig‘ishga kirishi ko‘plab to‘qnashuvlarga sabab bo‘ladi. Labli ayiqni asrash mintaqaning ekologik barqarorligi uchun muhimdir.