Bugungi kunda ziravorlar va chili qalampiri nafaqat taomlarga o‘ziga xos mazza bag‘ishlovchi qo‘shimcha, balki organizm uchun foydali tabiiy vosita sifatida ham e’tirof etilmoqda. Mutaxassislar ta’kidlashicha, achchiq taomlar tarkibida mavjud faol moddalar inson salomatligiga ijobiy ta’sir ko‘rsatadi.
Xususan, chili qalampirida uchraydigan kapsaitsin moddasi yurak-qon tomir kasalliklarining oldini olishda, qon aylanishini yaxshilashda hamda ayrim nafas yo‘llari bilan bog‘liq muammolar xavfini kamaytirishda muhim ahamiyatga ega. Shu bilan birga, u bakteriyalarga qarshi kurashish xususiyatiga ega bo‘lib, organizmdagi yallig‘lanish jarayonlarini pasaytirishga yordam beradi.
Achchiq taomlar iste’mol qilinganda organizmda endorfin — ya’ni “baxt gormoni” ishlab chiqarilishi faollashadi. Bu esa insonning kayfiyatini ko‘tarish, ruhiy holatni yaxshilash va kun davomidagi charchoqni kamaytirishga xizmat qiladi.
Shu bilan birga, mutaxassislar achchiq ovqatlarni me’yordan ortiq iste’mol qilmaslikni tavsiya etadi. Ayniqsa, gastrit, oshqozon yarasi va hazm tizimi bilan bog‘liq muammolari bor insonlar uchun bunday taomlar ehtiyotkorlik bilan, oz miqdorda iste’mol qilinishi lozim.
Umuman olganda, achchiq taomlarni me’yorida va muntazam ravishda tanovul qilish sog‘liqni mustahkamlash hamda umumiy holatni yaxshilashning eng to‘g‘ri va samarali usullaridan biri hisoblanadi.
“Zamin”ni Telegramʻda oʻqing!
