Nikoh kuni

Asr namozini ado qilib bo‘lgach, qiz oynaga qarab pardoz qilar, nikoh to‘yiga hozirlik ko‘rib, qordek oppoq kelinlik libosini kiyayotgan edi. Shu asnoda u shomga aytilayotgan azonni eshitib qoldi va namozini o‘qib olmoqchi bo‘ldi. Shunda tahorati buzilganligi sabab onasiga:

– Oyi, men tahorat olib, namozimni o‘qib olay, - dedi.

– Esing joyidami? Hozir kuyov keladi. Tahorat olsang, yuzingdagi “makiyaj”ing rasvo bo‘ladi-ku..! Bas, yetar, sening onangman..! Ayni damda namoz o‘qishing shart emas! Allohga qasamki, hozir “makiyaj”ni buzib, tahorat olsang, sendan ranjiyman..! - dedi ona xunob bo‘lib.

– Onajon, Allohga qasamki, men namozimni o‘qimasdan bu xonadan chiqmayman, - dedi qiz muloyimlik bilan.

– O‘zi shundog‘am vaqt oz qoldi. Mehmonlar oldiga qanday qilib makiyajsiz chiqasan.! Qiz bola kelin bo‘lganida ochilib turishi lozim. Mehmonlar sening ustingdan kulib yurishini istaysanmi, jon qizim?

– Onajon, siz mening odamlarga chiroyli ko‘rinmasligimdan qo‘rqyapsizmi? Undan ko‘ra, mening Robbimning huzurida ahvolim qanday bo‘lishini o‘ylasangiz-chi!? Qo‘rqqanim shuki, agar namozimni o‘tkazib yuborsam, Yaratgan Egamning oldida amali chiroylilardan bo‘lmay qolaman, dedi-da qiz tahorat olishni boshladi.

Yuzidagi hamma bo‘yoqlar suv bilan oqib tushdi. Keyin u namozini o‘qishga kirishdi. Sajdaga bosh qo‘yar ekan, bu oxirgi sajdasi ekanligini bilmas edi.

Ha..! U sajdaga borganida nafas olishdan to‘xtadi. Robbisini itoatida mustahkam turib, bu dunyoni tark etgan muslima uchun bundan ortiq oliy maqom bormikan?!

U hayotining shunday muhim kunida ham Robbisi va uning itoatini birinchi o‘ringa qo‘ydi. Buning evaziga esa uning joni Allohga ibodatning eng ulug‘ holati – sajdada olindi. U Robbisiga yaqin bo‘lishni xohladi!

Manba: Azon.uz
“Zamin” yangiliklarini “Vkontakti”da kuzatib boring