Nils Annen yurtimizga so‘nggi bor 2018 yil sentyabr oyida kelgan.
Foto: BPA/Steffen Kugler
Germaniya O‘zbekistonda turli yo‘nalishdagi loyihalarni qo‘llab-quvvatlash uchun 195 mln yevro mablag‘ ajratishi kutilmoqda.
Bu haqda mamlakatimizda mehmon bo‘lib turgan Germaniya iqtisodiy hamkorlik va taraqqiyot federal vaziri o‘rinbosari (parlament stats-sekretari) Nils Annen “Xabar.uz” muxbiri bilan suhbatda maʼlum qildi. Yuqori martabali mehmon geosiyosiy jarayonlarning O‘zbekistonga taʼsiri, xalqaro sanksiyalarga doir savollarga ham aniqlik kiritdi.
«O‘zbekistonda rasmiy muzokaralar olib bormoqdaman. Zero, koronavirus pandemiyasi biroz chekindi. Endilikda ortga boqib, ishlarni sarhisob qilish va hamkorlik borasida yangi marralarni zabt etish vaqti keldi. Mamlakatingizga xushxabar bilan keldim: O‘zbekistonga 195 mln yevro ko‘mak taklif qilinmoqda. Ushbu mablag‘ qaysi yo‘nalishlarga sarflanishi borasida hozircha bir to‘xtamga kelinganicha yo‘q. Anig‘i shuki, mablag‘ning salmoqli qismi shaharsozlik loyihalariga yo‘naltiriladi», – deydi Nils Annen.
Germaniya hukumati, xususan, iqtisodiy hamkorlik va taraqqiyot federal vazirligi ko‘magida yurtimizda tibbiyotdan atrof-muhitni muhofaza qilishga qadar – turli sohalarda loyihalar amalga tatbiq etilmoqda. Masalan, joriy yil 12 avgust ushbu vazirlik nomidan “KfW” banki O‘zbekiston sog‘liqni saqlash vazirligi bilan 45 million yevro miqdoridagi imtiyozli kredit va 5,5 million yevro miqdoridagi grantni moliyalashtirish bo‘yicha kelishuv imzoladi.
Vazirlik, shuningdek, 2022-2026 yillarda amalga oshiriladigan Markaziy Osiyoda iqlim o‘zgarishi xavflarini boshqarish loyihasi uchun 10 million yevro ko‘mak ajratdi.
«Mamlakatingiz bilan o‘n yilliklar davomida yaqin hamkorlik qilib kelyapmiz. Ayniqsa, prezident Shavkat Mirziyoyev islohotlari tufayli O‘zbekiston yana-da jozibador davlatga aylandi. Jumladan, germaniyalik sarmoyadorlar ham turli sohalarga investitsiya kiritishga qiziqish bildirmoqda. O‘zbekiston 35 milliondan ziyod aholiga, katta tabiiy boyliklarga ega. Mamlakat salohiyatini to‘laqonli ro‘yobga chiqarish mintaqa uchun ham muhim ahamiyat kasb etadi. Biz O‘zbekistonning taraqqiyot yo‘lidagi qiyinchiliklarni yengish va yangi kelajak yaratishida ko‘makka tayyormiz», – deydi germaniyalik arbob.
Maʼlumotlarga qaraganda, joriy yilning birinchi yarmida, koronavirus pandemiyasi tarqalishi bilan bog‘liq cheklov choralariga qaramay, ikki davlat o‘rtasidagi tovar ayirboshlash hajmi sezilarli darajada oshib, 499,4 million dollarni tashkil etgan. Mamlakatimizda olmon sarmoyasi ishtirokida faoliyat yuritayotgan korxonalar soni esa 200 dan oshgan.
Noyabr oyi boshida O‘zbekistonga tashrif buyurgan Germaniya federal tashqi ishlar vaziri Annalena Berbok suverenitet va davlatlarning o‘z taqdirini o‘zi belgilash huquqi oliy qadriyat ekanini taʼkidlagan edi.
Olmon bosh diplomati, ayni choqda, Markaziy Osiyoda Xitoy va Rossiya taʼsirini kamayirish lozimligiga eʼtibor qaratgandi.
Suhbatdoshimiz Nils Annen ham Moskva va Pekinning taʼsirini kamaytirish qay jihatdan muhim ekaniga oydinlik kiritdi.
«Rossiyaning Ukrainaga bosqinchilik urushidan keyin Markaziy Osiyoga bo‘lgan munosabatimiz o‘zgardi. Annalena Berbok xonimning Rossiya va Xitoy taʼsirini kamaytirishga doir fikri ham ayni paytda Germaniyada kechayotgan bahs-munozaralarga hamohangdir. Albatta, Xitoy va Rossiya mintaqada muhim faktor bo‘lib qolishini tan olamiz. Ammo infratuzilmani yaxshilash kabi yo‘nalishlarga ko‘mak orqali muqobil yo‘l taklif etish niyatidamiz», – deydi olmon hukumati vakili.
N.Annenga ko‘ra, Rossiya bosqini ortidan Markaziy Osiyoda ham inflyatsiya va oziq-ovqat narxi oshishi kuzatildi. Bu esa muqobil hamkorlik muhimligining yana bir tasdig‘idir.
Maʼlumki, Ukraina urushi ortidan kollektiv G‘arb, jumladan, Yevropa Ittifoqi Rossiyaga qarshi sanksiyalar joriy etdi. Keyingi vaqtlarda xorij matbuotida Rossiyaga ehtimoliy ko‘mak ortidan O‘zbekistondagi kompaniya va shaxslar ham ikkilamchi sanksiyaga tushishi mumkinligi haqida maqolalar eʼlon qilindi. Germaniyalik arbob bu borada ham muxtasar mulohazalari bilan o‘rtoqlashdi.
«Sanksiyalar faqat Rossiyaga, uning moliyaviy tuzilmalariga, ushbu mamlakatning tashkilot va shaxslariga qaratilganini taʼkidlashni istardim. Moliyaviy choralar Rossiyaga qattiq taʼsir ko‘rsatmoqda. Lekin sanksiyalar boshqa davlatlarga salbiy taʼsir ko‘rsatmasligi ko‘zda tutilgan. Shunisi aniqki, dunyodagi hozirgi iqtisodiy inqirozning bosh aybdori – Rossiyadir. Agar rasmiy Moskva BMT qadriyatlari va hujjatlariga sodiqligini isbotlay olsa, o‘z armiyasini Ukrainadan olib chiqib ketsa, aksar masalalar yechim topadi», – deydi u.
Siyosatchining taʼkidlashicha, O‘zbekiston Germaniyaning mintaqadagi markaziy hamkorlaridan biri bo‘lib qoladi.
«Inqirozli-sinovli damlarda O‘zbekistonga tayansak bo‘ladi. Biz buni Afg‘onistondagi bir yil oldingi hodisalarda ko‘rdik», – deya xulosa qiladi Nils Annen. “Zamin” yangiliklarini “Telegram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
“Hizbulloh” bir sutkada Isroilga qarshi 20 ga yaqin harbiy amaliyot o‘tkazdi
Xalqaro jinoyat sudi Isroil bosh vaziri Netanyaxuni hibsga olishga order berdi
Superliga. OKMK safarda "Paxtakor"ni mag‘lub etdi va 11 yillik qora an’anaga chek qo‘ydi
Turkiya o‘zining birinchi kvant kompyuterini taqdim etdi
Husiylar Isroil aviabazasiga gipertovushli raketa bilan zarba berdi
Har payshanba jismoniy tarbiya va sport kuni sifatida belgilanadi
Ramzan Qodirov G‘arb davlatlariga hujum qilishga chaqirdi: “Haqiqiy urush qandayligini his qilishsin”
Metabolizm sekinlashganining belgilari
