Jahon banki O‘zbekiston iqtisodiyoti yuqori sur’atda o‘sib borishini prognoz qilmoqda

Jahon banki O‘zbekiston Yevropa va Markaziy Osiyodagi eng tez rivojlanayotgan iqtisodiyotlardan biriga aylanishini prognoz qilmoqda.

“Bir qator inqirozlardan so‘ng mintaqadagi rivojlanayotgan mamlakatlarda o‘sish sur’atlari pastroq darajada bo‘lsa-da, barqarorlashmoqda. Iqtisodiy o‘sish 2024 yilda 3,5 foizni tashkil qildi, bu ko‘rsatkich o‘tgan yilgi bilan bir xil, lekin 2000 yillardagi o‘rtacha 5,1 foiz ko‘rsatkichdan past.

Yalpi ichki mahsulotning o‘sishi prognozi bo‘yicha Gruziya 7,5 foiz bilan yetakchilik qilmoqda, Tojikiston 7,2 foiz bilan uchinchi o‘rinda. O‘zbekiston bu borada uchinchi o‘rinda bo‘lib, YAIM 6 foizga o‘sishi prognoz qilingan. Markaziy Osiyo eng tez rivojlanayotgan submintaqa bo‘lib, O‘zbekiston 2025 va 2026 yillarda mos ravishda 5,8-5,9 foiz o‘sish sur’atlari bilan yetakchilik qiladi.

^{Foto: Jahon banki}
Mintaqa iqtisodidagi pasayish ko‘p jihatdan eng yirik davlatlar iqtisodiyotidagi pasayish bilan bog‘liq. Rossiyada yalpi ichki mahsulot 2023 yildagi 3,6 foizdan 2025 yilda 1,6 foizga tushadi, Turkiyada esa 2025 yilda o‘sish 2,6 foizgacha sekinlashadi.

O‘sishning asosiy omillariga ish haqining oshishi, budjet to‘lovlari va inflyatsiyaning pasayishi kiradi. Eksport faolligi zaiflashgan va inflyatsiya, ayniqsa, O‘zbekistonda energiya tariflari o‘zgarganidan keyin yuqoriligicha qolayotgan bo‘lsa-da, turizm sanoatining tiklanishi ham muhim ahamiyatga ega.

Pul o‘tkazmalari oqimi ham pandemiyagacha bo‘lgan darajadan yuqori va ular Markaziy Osiyoda iqtisodiy ekspansiyani qo‘llab-quvvatlashda davom etmoqda”, deyiladi Jahon banki hisobotida.

Shuningdek, Jahon banki innovatsiyalar va barqaror o‘sishni rag‘batlantirish uchun ta’lim sifatini oshirish, o‘quv dasturlarini yangilash, ayniqsa, STEM bo‘yicha o‘qituvchilar sonini ko‘paytirishga e’tibor qaratishni tavsiya qildi.

Jahon banki, O‘zbekiston iqtisodiyoti, Yuqori sur’at, O‘sib borishi, Prognoz qilmoqda “Zamin” yangiliklarini “Instagram”da kuzatib boring