2017-2023 yillarda O‘zbekistonning umumiy eksporti 120 mlrd dollarni tashkil etdi

Ummonning Asdaa Oman elektron gazetasida "O‘zbekiston o‘zining mahsulotlarini 115 davlatga eksport qilmoqda" sarlavhali maqola e’lon qilindi, deb xabar bermoqda "Dunyo".

Nashrda respublikada "O‘zbekiston-2030" strategiyasida belgilangan maqsadlarga – eksportdagi xususiy sektor ulushini 60 foizga oshirishga qat’iy amal qilgan holda eksport tizimli ravishda qo‘llab-quvvatlanmoqda, deb ta’kidlangan.

2017-2023 yillarda O‘zbekistonning umumiy eksporti 120 milliard AQSH dollarini tashkil etdi. Birgina 2023 yilda eksport 24 milliard dollarga yetdi, bu 2017 yilga nisbatan 64 foizga o‘sdi.

Oxirgi olti yilda O‘zbekiston eksport yetkazib berish geografiyasini yana 33 ta yangi davlatni qamrab olgan holda kengaytirib, umumiy tashqi bozorlar sonini 115 taga yetkazdi. Bugungi kunda O‘zbekiston mahsulotlari Peru, Panama, Meksika, Dominikan, Argentina va Albaniya, Serbiya, Finlandiya, Luksemburg va boshqa mamlakatlar bozorlariga birinchi marta kirdi.

Qayd etilganidek, so‘nggi yillarda eksportni qo‘llab-quvvatlash milliy tizimi korxonalarni eksport faoliyatiga jalb etishga alohida e’tibor qaratilmoqda. Masalan, o‘tgan yili 3 mingga yaqin mahalliy korxona eksport faoliyatiga qo‘shildi. Joriy yilning yanvar-oktyabr oylari davomida 2 ming 450 ta korxona ilk bor tashqi bozorga chiqib, jami 1 milliard dollarlik mahsulot eksport qildi.

Maqola xulosasida: "Umuman olganda, O‘zbekistonda eksportni qo‘llab-quvvatlashga qaratilgan joriy islohotlar 2030 yilgacha bo‘lgan milliy strategiyada belgilangan maqsadlarga erishishga ishonch bilan yo‘l ochmoqda", – deb yozilgan. “Zamin” yangiliklarini “Telegram”da kuzatib boring