Markaziy bank 2025-yil sentyabr holatiga oid inflyatsiya ko‘rsatkichlarini e’lon qildi. Ma’lumotlarga ko‘ra, umumiy yillik inflyatsiya 2022-yilda 12,3 foiz bo‘lgan bo‘lsa, 2023-yilda 8,8 foizgacha pasaygan. 2024-yilda inflyatsiya biroz oshib, 9,8 foizni tashkil etgan, 2025-yil sentyabr holatiga kelib esa 8 foizga tushgan.
Markaziy bank hisobotida qayd etilishicha, narxi 10 foizdan yuqori oshgan tovar va xizmatlar ulushi yillar davomida qisqargan. Agar 2022-yilda bunday mahsulotlar umumiy bozorning 52 foizini tashkil etgan bo‘lsa, 2025-yil sentyabriga kelib bu ko‘rsatkich 14 foizgacha pasaygan. Bu narx bosimlarining barqarorlikka o‘tib, “yuqori inflyatsiyali” elementlar soni sezilarli kamayganini anglatadi.
Oziq-ovqat mahsulotlari
Infografika ma’lumotlariga ko‘ra, ayrim mahsulotlar narxi ancha arzonlashgan. Masalan, qovoq (-59,2%), pomidor (-31,5%), bodring (-30,7%), baqlajon (-21%), shaftoli (-20,5%) va anor (-20,4%) narxlari pasaygan.
Biroq ba’zi mahsulotlarda keskin qimmatlashish kuzatilgan. Sabzi narxi 57,5%, limonniki 52,5%, paxta moyi 35,9%, sholg‘om 30,8%, karam 27,4%, qo‘y go‘shti esa 26,8 foizga qimmatlagan.
Nooziq-ovqat tovarlari
Bu toifada ayrim mahsulotlar arzonlagan: propan narxi 19,7%, qog‘oz A4 – 3,7%, shprislar esa 0,4%ga tushgan.
Shu bilan birga, oltin bozoridagi rekord darajadagi o‘sish zargarlik buyumlari narxlariga ham ta’sir qilgan — nikoh uzugi 33,4 foizga qimmatlagan. Shuningdek, metan (+30,6%), gazeta (+15,3%), benzin (+11,8%) va tabiiy gullar (+10,9%) narxlari ko‘tarilgan.
Xizmatlar sohasi
Xizmatlar bozorida ham sezilarli farq kuzatilgan. Pul o‘tkazmalari uchun haq to‘lash narxi 2,5%ga, nodavlat oliy ta’lim muassasalarida o‘qish haqi esa 0,2%ga arzonlashgan.
Biroq ayrim xizmatlar keskin qimmatlagan. Haydovchilik kurslari narxi 73,3%, ichki aviaqatnovlar 57,3%, tarmoq gaz 39,2%, sovuq suv 35,1%, muzey xizmatlari 32,3%, huquqiy xizmatlar esa 29,1 foizga ko‘tarilgan.
Sentyabr oyi yakunida yillik narx o‘sishi 10 foizdan past bo‘lgan mahsulotlar ulushi oziq-ovqatda 86%, nooziq-ovqatda 96%, xizmatlar sohasida esa 56%ni tashkil etdi.
Mutasaddilar ta’kidlashicha, bu ko‘rsatkichlar bozordagi barqarorlikka va inflyatsiya bosimlarining susayishiga ishora qilmoqda. Shu bilan birga, ayrim mahsulotlardagi mavsumiy narx o‘zgarishlari iqtisodiy jarayonlarga ta’sir etishda davom etmoqda.
“Zamin”ni Telegramʻda oʻqing!
