O‘zbekiston moliyaviy sohasida yangi ishtirokchi paydo bo‘ldi: mamlakatda birinchi mikromoliyaviy bank – “Tayanch” o‘z faoliyatini boshladi. Bu 24-oktabr kuni O‘zbekiston Markaziy banki tomonidan “Tayyab Finance Mikromoliya Tashkiloti” aksiyadorlik jamiyatiga tegishli litsenziya berilgandan so‘ng amalga oshdi.
Ushbu jarayon natijasida “Tayyab Finance” mikromoliya tashkiloti mikromoliyaviy bank sifatida qayta tashkil etildi va “Tayanch” deb nomlandi. Hozirgi paytda Markaziy bank ushbu tashkilotning yangi maqomini davlat reyestriga kiritish uchun zarur o‘zgartirishlarni amalga oshirmoqda.
Ushbu o‘zgarishlar jarayoni iyul oyida boshlangan bo‘lib, “Tayyab Finance” birinchi bo‘lib mikromoliya bankka aylanish uchun oldindan ruxsat olgan tashkilotlardan biri edi. Yangi maqomga moslashish uchun kompaniya ustav fondini sezilarli darajada oshirdi.
Davlat korxonalari va tashkilotlari yagona reyestriga ko‘ra, dastlab 2022-yil oktabr oyida Toshkent shahrining Sergeli tumanida ro‘yxatdan o‘tgan bankning ustav fondi 13,9 milliard so‘mdan 53,9 milliard so‘mga oshirilgan. Bank asoschilari sifatida Alvira Faritovna Hanipova va Akbarbek Rovshanbek o‘g‘li Mustaqimov teng ulushlarda (50 foizdan) qatnashgan.
Yangi turdagi moliyaviy institutlarning tashkil etilishi fevral oyida Prezident Shavkat Mirziyoyev tomonidan imzolangan qonun tufayli amalga oshdi. Ushbu qonun mikromoliyaviy banklarning faoliyati uchun huquqiy asos yaratdi va ular mikromoliya tashkilotlari hamda an’anaviy tijorat banklari o‘rtasidagi bo‘shliqni to‘ldirishi ko‘zda tutilgan.
Qonunchilik yangi bozor ishtirokchilari uchun aniq talablarni belgilab berdi. Mikromoliyaviy banklar uchun minimal ustav kapitali 50 milliard so‘m etib belgilandi.
Ular aholining 200 million so‘mgacha bo‘lgan omonatlarini qabul qilish va 5 milliard so‘mgacha bo‘lgan kreditlarni taqdim etish huquqiga ega. Eng muhim talablardan biri esa kichik biznesni qo‘llab-quvvatlashga qaratilgan: bunday banklarning kredit portfelining kamida 70 foizi mikrova o‘zini o‘zi band qilgan fuqarolarni moliyalashtirishga yo‘naltirilishi lozim.
Fintex sohasi eksperti va PayWay kompaniyasi hammuassisi Behzod Botirovning fikriga ko‘ra, mikromoliyaviy banklarning paydo bo‘lishi tadbirkorlikni rivojlantirish va bank sohasiga ijobiy ta’sir ko‘rsatadi. O‘zbekistonda mikromoliyaviy banklar tashkil etilishi moliyaviy xizmatlarning ommabopligini oshirish bo‘yicha keng qamrovli strategiyaning bir qismidir.
Statistika ma’lumotlariga ko‘ra, mamlakatda mikromoliya xizmatlari bozori sezilarli o‘sishni ko‘rsatmoqda, bu esa aholi va kichik biznes orasida kredit mahsulotlariga bo‘lgan yuqori talabni tasdiqlaydi. “Zamin”ni Telegramʻda oʻqing!
Ctrl
Enter
Xato topdIngizmi?
Iborani ajratib Ctrl+Enter tugmasini bosing Mavzuga oid yangiliklar
