O‘zbekistonga 370 mln dollarlik telefonlar import qilindi

Joriy yilning dastlabki uch choragida O‘zbekistonga mobil telefonlarning rasmiy import hajmi 370 million dollardan oshdi. Milliy statistika qo‘mitasi ma’lumotlariga ko‘ra, mamlakatga 3,21 million dona telefon olib kirilgan bo‘lib, bu elektronika bozorida yuqori iste’mol faolligi davom etayotganidan dalolat beradi.

Statistik ma’lumotlar tahliliga ko‘ra, uchinchi chorakda import operatsiyalari sezilarli sur’atda oshgan. Iyuldan sentyabr oyigacha respublikaga 1,33 million dona telefon, umumiy qiymati 176,4 million dollarga teng bo‘lgan mahsulotlar keltirildi.

Ushbu ko‘rsatkichlar birinchi yarim yillikdagi 1,88 million dona telefon importiga nisbatan sezilarli darajada yuqori. O‘tgan yilning shu davriga nisbatan esa import hajmi 7,4 foizga yoki qariyb 220 ming dona telefonlarga oshgan.

Xitoy Xalq Respublikasi O‘zbekiston mobil telefon bozorida yetakchi o‘rinni saqlab qolmoqda. Yil boshidan buyon Xitoydan 2,49 million dona telefon import qilingan bo‘lib, bu umumiy hajmning 77,5 foizini tashkil etadi.

Faqatgina uchinchi chorakda Xitoydan 1,06 million dona telefon olib kirilgan va bu davrda Xitoy mahsulotlarining ulushi qariyb 80 foizga yetgan. Ikkinchi o‘rinda Vetnam joylashdi.

Bu mamlakatdan 9 oy ichida 619,2 ming dona telefon import qilinib, umumiy hajmning 19,3 foizini tashkil etdi. Qiziqarli tomoni shundaki, ushbu ko‘rsatkich o‘tgan yilgi umumiy import hajmidan ham oshib ketdi.

Vetnamdan uchinchi chorakda 244,1 ming dona telefon olib kirilgan. Uchinchi o‘rinda Birlashgan Arab Amirliklari (BAA) joylashgan, ammo ushbu mamlakatdan import hajmi sezilarli darajada kamaygan.

To‘qqiz oy davomida BAAdan 65,3 ming dona telefon olib kirilib, bu umumiy bozor ulushining faqat 2 foizini tashkil etdi. Ayniqsa uchinchi chorakda BAA mahsulotlari importi keskin kamayib, atigi 1,1 ming dona telefon olib kirilgan.

Hindiston esa o‘z ulushini oshirishda davom etmoqda. Hisobot davrida ushbu mamlakatdan 31,85 ming dona telefon olib kirilib, bu umumiy bozor ulushining deyarli 1 foizini tashkil etdi.

Faqatgina uchinchi chorakda Hindistondan 15,4 ming dona telefon import qilingan, bu birinchi yarim yillikdagi ko‘rsatkichlarga tengdir. Yetakchi beshlikni Janubiy Koreya yakunlab, ushbu mamlakatdan 4,8 ming dona telefon olib kirilgan.

Qolgan davlatlarning ulushi esa jami 2,2 ming dona telefonni tashkil etdi. Taqqoslash uchun, 2024 yilda O‘zbekistonga mobil telefonlarning rasmiy import hajmi 4,2 million donani tashkil etgan bo‘lib, bu avvalgi yilga nisbatan qariyb chorak qismga ko‘proq edi.

O‘shanda Vetnamdan import ko‘rsatkichlari sezilarli oshgan bo‘lsa, Hindistondan telefon olib kirish hajmi uch karra ko‘paygan edi. So‘nggi ma’lumotlar bu tendensiyaning davom etayotganini ko‘rsatmoqda.

“Zamin”ni Telegramʻda oʻqing!