O‘zbekistonda Ramazon hayiti 2 may kuni nishonlanadi

Shavkat Mirziyoyev «Ramazon hayitini nishonlash to‘g‘risida» qarorga imzo chekdi.

Qaror bilan, 2022 yilda Ramazon hayitining birinchi kuni 2 may – dushanba kuniga to‘g‘ri kelishi to‘g‘risida O‘zbekiston musulmonlari idorasi Ulamolar kengashi tomonidan qabul qilingan qarorni inobatga olib, mamlakatda 2022 yil 2 may kuni Ramazon hayiti bayrami sifatida keng nishonlanishi belgilandi.

O‘zbekiston prezidentining 2022 yil 30 apreldagi «O‘zbekiston Respublikasi prezidentining 2021 yil 20 dekabrdagi «2022 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida»gi PF-35-son Farmoniga o‘zgartirishlar kiritish to‘g‘risida»gi PF-131-son farmoni bilan 2022 yil 3–4 may kunlari qo‘shimcha dam olish kunlari sifatida belgilangani ma’lumot uchun qabul qilindi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Din ishlari bo‘yicha qo‘mita, Mahalla va nuroniylarni qo‘llab-quvvatlash vazirligi hamda jamoat tashkilotlari bilan hamkorlikda Ramazon hayiti o‘zbek xalqi milliy va diniy an’analariga mos ravishda o‘tkazilishi uchun tegishli chora-tadbirlarni amalga oshiradi.

Turizm va madaniy meros vazirligi Transport vazirligi bilan birgalikda yurtdoshlarimiz uchun muborak Ramazon hayiti kunlarida mo‘’tabar ziyoratgohlar va tarixiy qadamjolarga ziyoratlarini tashkil etish maqsadida qulay sharoit va imkoniyatlar yaratadi.

Shuningdek, qarorda O‘zbekiston Milliy teleradiokompaniyasi, O‘zbekiston Milliy axborot agentligi va boshqa ommaviy axborot vositalariga Ramazon hayitini nishonlash bilan bog‘liq tadbirlarni keng yoritish tavsiya etiladi. “Zamin” yangiliklarini “Vkontakti”da kuzatib boring