Buxoro universitetiga ishga joylashtirish evaziga 400 dollar pora olgan xodim ushlandi

^{Foto: Milliy gvardiya boshqarmasi}
Buxoro davlat universitetiga fuqaroni ishga joylashtirish evaziga pora olgan xodim ushlandi. Bu haqda viloyat Milliy gvardiya boshqarmasi axborot xizmati rahbari Murodjon Rahmatullayev ma’lum qildi.

Ta’kidlanishicha, shofirkonlik fuqaro N.B. bundan bir necha oy ilgari Buxoro davlat universiteti ishchisi G.G‘. uni tyutorlik vazifasiga ishga kiritib qo‘yishi evaziga 500 dollar talab qilgan. U mazkur summaning 400 dollarini ishga kirguncha va qolgan 100 dollarini ishga joylashtirgandan so‘ng berishini so‘ragan.

N.B. huquq-tartibot idoralariga hozirga qadar ishga joylashtirish masalasida fuqaro G.G‘. undan 400 dollar olgan bo‘lishiga qaramay, uni aldab kelayotgani va bergan pulini qaytarib bermayotgani yuzasidan ariza bilan murojaat qilgan.

Ariza yuzasidan Milliy gvardiya viloyat bo‘yicha boshqarmasi harbiy qism razvedka guruhi harbiy xizmatchilari va Iqtisodiy jinoyatlarga qarshi kurashish departamentining viloyat boshqarmasi xodimlari bilan hamkorlikda tezkor tadbir o‘tkazilgan. O‘tkazilgan tadbir davomida G.G‘. Buxoro davlat universitetida faoliyat yurita turib, o‘z xizmat mavqeyidan foydalangan holda N.B.dan haqiqatan ham pora olgani ochiqlangan. N.B. universitet ishchisi G.G‘.ga qo‘ng‘iroq qilib, ishga kirishi evaziga bundan bir necha oy ilgari bergan 400 dollarni qaytarib berishini so‘ragan. Shunda u N.B.dan olgan pulini taksi haydovchisi L.M. orqali yetkazishini ma’lum qilgan.

^{Foto: Milliy gvardiya boshqarmasi}
Ayni paytda holat yuzasidan departamentning viloyat boshqarmasi xodimlari tomonidan tegishli protsessual hujjatlar rasmiylashtirilib, surishtiruv ishlari olib borilmoqda. “Zamin” yangiliklarini “Youtube”da kuzatib boring