Shavkat Mirziyoyev Umra ziyoratini amalga oshiradi

Tashrif oldidan O‘zbekiston musulmonlar idorasi raisi, muftiy Nuriddin domla Xoliqnazarov ezgu tilaklarini bildirdi.

Avval xabar berganimizdek, Prezident 17-18 avgust kunlari Saudiya Arabistoni podshohi Salmon bin Abdulaziz Ol Saudning taklifiga binoan davlat tashrifi bilan ushbu mamlakatga boradi. «Albatta, bu juda ham tarixiy tashrif. Sababi, 30 yil ichida birinchi marta prezidentimizning Saudiya Arabistoniga [davlat] tashrifi amalga oshmoqda.

Tashrif davomida davlatimiz rahbari Saudiya Arabistoni podshosi, u yerdagi mutasaddilar, juda ko‘p tashkilotlar, Islom taraqqiyot banki va boshqa tashkilot rahbarlari bilan uchrashuvlar qiladi. Inshaalloh, mana shu uchrashuvlar orqasidan yurtimizga juda katta iqtisodiy rivojlanishga sabab bo‘ladigan hujjatlar imzolanadi», – dedi Nuriddin Xoliqnazarov. Muftiyning qo‘shimcha qilishicha, Davlat rahbari tashrif doirasida Umra ziyoratida ham bo‘ladi.

Muftiy, shuningdek, Prezidentning ushbu tashrifi ham siyosiy, ham iqtisodiy, ham diniy-ma’naviy tomondan manfaatli bo‘lishi uchun xalqdan duo qilishini so‘ragan.

Ma’lumot uchun, Prezident Shavkat Mirziyoyev Ikki muqaddas masjid xodimi – Saudiya Arabistoni Podshohi Salmon bin Abdulaziz Ol Saudning taklifiga binoan ikki kun davlat tashrifi bilan ushbu mamlakatda bo‘ladi.

Tashrif dasturiga muvofiq, Jidda shahrida oliy darajadagi O‘zbekiston-Saudiya sammitining asosiy tadbirlari bo‘lib o‘tadi.

Muzokaralar kun tartibidan mamlakatlar o‘rtasidagi ko‘p qirrali hamkorlikni, eng avvalo, savdo-iqtisodiyot, investitsiya, energetika, moliya sohalarida va madaniy-gumanitar yo‘nalishda yanada kengaytirishning dolzarb masalalari o‘rin olgan.

Alohida e’tibor “yashil” iqtisodiyot, yuqori texnologiyalar va raqamlashtirish, tibbiyot, kichik biznes va tadbirkorlik sohalarida qo‘shma loyiha va dasturlarni amalga oshirishga qaratiladi.

Sammit yakunida ikki tomonlama bitimlarning salmoqli to‘plamini imzolash rejalashtirilgan. “Zamin” yangiliklarini “Twitter”da kuzatib boring