17:48 / 13.05.2016
7 432

O‘zbekistonlik talaba Janubiy Koreyadagi notiqlik tanlovida g‘olib bo‘ldi

O‘zbekistonlik talaba Janubiy Koreyadagi notiqlik tanlovida g‘olib bo‘ldi
Janubiy Koreyadagi Kyonxe universiteti tomonidan o‘tkazilgan notiqlik san’ati tanlovida o‘zbekistonlik talaba Rahimboboyev Baxtiyor sharafli birinchi o‘rinni qo‘lga kiritdi. Tanlovda 15 mamlakatdan 17 nafar ishtirokchi omadini sinab ko‘rdi. Bu haqda "Kun" nashri xabar berdi.

“Koreya umidlari” va “Koreya madaniyati bilan bog‘liq shaxsiy tajriba” mavzulari doirasida u “Janubiy Koreyada osiyoliklarni kamsitish” mavzusida nutq so‘zladi.

U koreys tilini ilk bor boshlang‘ich sinfda o‘qib yurganda o‘zbek telekanallari orqali efirga uzatilgan filmda eshitgan. Shundan keyin u Janubiy Koreyada o‘qish umidida har kuni sakkiz soatlab koreys tilini o‘rgana boshlaydi.

24 yoshli Baxtiyor hozir Sejong universitetida koreys adabiyotini o‘rganadi.

“Men bu erga qo‘limda 200 dollar bilan kelganman”, - dedi u va koreyalik yaxshi odamlarning qo‘llab-quvvatlaganini minnatdorchilik bilan esladi.

Mamlakatga bo‘lgan mehriga qaramasdan, u o‘ziga nisbatan irqiy kamsitilishni his qilgan.

“Men odamlarning g‘arbliklarga boshqacha munosabatda bo‘lishlarini sezaman. Mening asosiy maqsadim g‘alabaga erishish bo‘lsa ham, o‘z fikrlarimni minglab janubiy koreyaliklar bilan bo‘lisha olganimdan mamnunman”, deydi u.

12 may kuni o‘tkazilgan notiqlik tanlovida ishtirokchilarni qo‘llab-quvvatlash uchun 700 nafarga yaqin kishi tashrif buyurdi.

Tanlov birinchi marta 1998 yili o‘tkazilgan, bu yil 19-marta bo‘lib o‘tdi.

Eslatib o‘tamiz, avvalroq Yaponiyaning Tokio shahrida chet el elchixonalari xodimlari va chet elliklar o‘rtasida 19-marotaba bo‘lib o‘tgan «Yapon tilida notiqlik san’ati» tanlovida o‘zbekistonlik Faxriddin Ergashev g‘olib deb topilgan edi.

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Jamiyat » O‘zbekistonlik talaba Janubiy Koreyadagi notiqlik tanlovida g‘olib bo‘ldi