Farg‘onada elektr tarmoqlari korxonasi bo‘lim boshlig‘i 6,6 ming dollar pora bilan qo‘lga tushdi

^{Kadr: Telegram}
Davlat xavfsizlik xizmati xodimlari tomonidan o‘tkazilgan tezkor tadbirlar davomida korrupsiya va firibgarlik holatlariga chek qo‘yildi.

Qayd etilishicha, Farg‘ona viloyatining Rishton tumani elektr tarmoqlari korxonasida bo‘lim boshlig‘i lavozimida ishlovchi shaxs yakka tartibdagi tadbirkorning kulolchilikka ixtisoslashgan ustaxonasi elektr tarmog‘iga noqonuniy ulangani bois, unga nisbatan rasmiylashtirilgan dalolatnoma bo‘yicha 2 milliard so‘m miqdorida jarima solinishi mumkinligini aytib, ushbu jarimani kamaytirib berish evaziga 10 ming dollar talab qilgan.

Davlat xavfsizlik xizmati xodimlari tomonidan viloyat ichki ishlar boshqarmasi bilan hamkorlikda o‘tkazilgan tezkor tadbirda, u so‘ralgan pul mablag‘idan 6,6 ming dollarni pora sifatida olgan vaqtida ashyoviy dalillar bilan ushlangan.

Hamkorlikda o‘tkazilgan yana bir tezkor tadbirda esa Marg‘ilon shahar “Nadirmat” mahalla fuqarolar yig‘inidagi hokim yordamchisi tadbirkorlik bilan shug‘ullanmoqchi bo‘lgan fuqaroga Farg‘ona shahar Qirguli mavzesida joylashgan 0,5 sotix bo‘sh yer maydonini “E-auksion” platformasi orqali yutib, kadastr hujjatlarini tayyorlab berish evaziga 2 ming dollar olgan vaqtida ushlangan.

Hozirda ushbu shaxslarning barchasiga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda. “Zamin” yangiliklarini “Telegram”da kuzatib boring