Hyundai Rotem kompaniyasi Oʻzbekistonda elektropoezdlar ishlab chiqarishni rejalashtirmoqda

^{Foto: Transport vazirligi matbuot xizmati}
Oʻzbekiston transport vaziri oʻrinbosari Jasurbek Choriev Hyundai Rotem kompaniyasining Global Rail Group rahbari Kvak Chol Xun boshchiligidagi delegatsiya vakillari bilan uchrashdi. Bu haqda vazirlik matbuot xizmati xabar berdi.

Uchrashuvda tomonlar zamonaviy elektropoezdlarni ishlab chiqarishni mahalliylashtirish loyihasi yuzasidan fikr almashdi.

Xususan, Janubiy Koreyaning Korail kompaniyasi tomonidan bugungi kunda ekspluatatsiya qilinayotgan elektropoezdlar turini “Toshkent yoʻlovchi vagonlarni qurish va ta'mirlash zavodi” AJda mahalliylashtirish orqali ishlab chiqarish taklifi yuzasidan taqdimot oʻtkazildi.

Mahalliylashtirish asosida ishlab chiqarish taklif qilinayotgan elektropoezdlarning asosiy texnik xususiyatlari boʻyicha ma'lumotlar taqdim etildi.

Uchrashuv yakunida tomonlar loyiha boʻyicha qoʻshimcha imkoniyatlarni oʻrganish, takliflarni tahlil qilish va yangi ishlab chiqarish hududlarini koʻzdan kechirishni kelishib olishdi. “Zamin” yangiliklarini “Telegram”da kuzatib boring