18:23 / 09.01.2025

Gulnora Karimovaga qarashli boʻlgan “Sijjak” dam olish maskani Kasaba uyushmasiga berildi

^{Foto: Davkat aktivlarini boshqarish agentligi}
Avval Gulnora Karimovaga tegishli boʻlgan “Sijjak” dam olish maskani hukumat qarori bilan Kasaba uyushmasi tasarrufiga oʻtkazildi.

Vazirlar Mahkamasi tomonidan 2024 yil 27 dekabrda qabul qilingan qarorga koʻra, ushbu dam olish masakani Oʻzbekiston kasaba uyushmalari federatsiyasiga topshirilgan dam olish zonalari va bolalar sogʻlomlashtirish oromgohlari roʻyxatiga kiritildi.

Kasaba uyushmalari federatsiyasiga mulk huquqi asosida oʻtkaziladigan bolalar dam olish oromgohlari va dam olish maskanlari roʻyxati hukumatning 2023 yil 25 martdagi farmoyishi bilan tasdiqlangan.

“Sijjak” dam olish maskani haqida

^{Foto: E-auksion}
Ushbu dam olish maskani Toshkent viloyati Boʻstonliq tumani Sijjak mavzesidagi “Sarbogʻ” mahalla fuqarolar yigʻini hududida joylashgan. Gulnora Karimovaga tegishli boʻlgan maskan 2017 yilning 10 fevralida Jinoyat ishlari boʻyicha Toshkent viloyati sudi ajrimi bilan musodara etilgan. Keyinchalik musodara qilingan ushbu hashamatli qarorgoh ichidagi barcha jihozlari bilan Oʻzbekiston Triatlon federatsiyasiga vaqtinchalik foydalanishga berilgan edi. Ammo oxir-oqibat ushbu dam olish maskanini ommaviy savdolar orqali shaffoflik printsipi asosida sotuvga qoʻyishga qaror qilindi.

5,38 gektar hududni egallagan “Sijjak” 2021 yil aprelda, shuningdek, 2022 yilning aprel va oktyabrlarida sotuvga qoʻyilgan, biroq ob'ekt sotilmagan edi. Uning hududida sport inshooti, mehmonxona, uchta suzish havzasi, amfiteatr, kottej va boshqa binolar mavjud. Ob'ekt 70 milliard soʻmga baholangandi.

Prezidentning 2023 yil 14 iyundagi farmoniga muvofiq “Sijjak” dam olish maskani xususiylashtiriladigan ob'ektlar roʻyxatidan chiqarildi. U 124-maktab-internatning balansida saqlanib kelinayotgandi.

“Sijjak” dam olish maskani qanday koʻrinishda?

Mazkur majmuaning umumiy er maydoni 5,38 gektarni tashkil etadi. Bino va inshootlari esa 4 040 kvadrat metrdir. Oromgohda mehmonxona, bir nechta hovuz, amfiteatr, kottej va boshqa inshootlar mavjud.