O‘zbekiston xalqaro islom akademiyasiga yangi nom, yangi maqsad: islomshunoslikda yangi bosqich boshlanadi

Prezident tomonidan “Fuqarolarning vijdon erkinligi huquqi kafolatlarini mustahkamlash hamda diniy-ma’rifiy sohadagi islohotlarni yangi bosqichga olib chiqish chora-tadbirlari to‘g‘risida”gi muhim farmon imzolandi. Unga muvofiq, O‘zbekiston xalqaro islom akademiyasi nomi rasman o‘zgartirilib, endi u O‘zbekiston xalqaro islomshunoslik akademiyasi deb yuritiladi.

Yangi maqsad — islomshunoslik sohasida zamonaviy bilim va tajriba
Akademiyaga tayanch davlat oliy ta’lim va ilmiy-tadqiqot muassasasi maqomi berildi. U islomshunoslik va dinshunoslik sohalarida yuqori malakali mutaxassislar, darsliklar va ilmiy qo‘llanmalar tayyorlashga ixtisoslashadi.

Akademiyaning asosiy vazifalari:

• Islomshunoslik, dinshunoslik, din psixologiyasi, islom iqtisodiyoti, manbashunoslik va xalqaro munosabatlar bo‘yicha malakali kadrlar tayyorlash;
  
• Ilg‘or pedagogik texnologiyalar va xalqaro ta’lim tajribasi asosida ta’lim jarayonini tashkil etish;
  
• Vijdon erkinligi va konfessiyalararo bag‘rikenglikni rivojlantirish, radikalizm va ekstremizmga qarshi tadqiqotlar olib borish;
  
• Diniy-ma’rifiy adabiyotlar nashri va internetda ta’lim resurslari yaratish hamda muntazam yangilab borish;
  
• Talabalarda ma’naviy-axloqiy fazilatlar, Vatanparvarlik, kasbga sadoqat kabi tuyg‘ularni shakllantirish;
  
• Xalqaro va mahalliy ilmiy va ta’lim muassasalari bilan yaqin hamkorlik yo‘lga qo‘yish.
  

Akademiya moliyasi — davlat tomonidan qo‘llab-quvvatlanadi
Akademiya faoliyatidagi xarajatlarni qoplash uchun to‘lov-kontrakt asosidagi daromadlar yetishmagan taqdirda, davlat budjeti hisobidan ajratilgan mablag‘lar doirasida tuzatishlar kiritiladi va qoplash ta’minlanadi.

Siz bu o‘zgarishni qanday baholaysiz? Islomshunoslik sohasidagi ilmiy yunalishlarning rivoji mamlakatimizda qanday ijobiy o‘zgarishlarga olib kelishi mumkin, deb o‘ylaysiz? “Zamin”ni Telegramʻda oʻqing!