Toshkentda firibgar va advokat pora bilan qo‘lga tushdi!

O‘zbekiston Davlat xavfsizlik xizmati Call-markaziga kelib tushgan shikoyat ortidan navbatdagi shov-shuvli jinoyat fosh etildi. Bu safargi holatda ham firibgarlik bilan bog‘liq holat poytaxtimizda aniqlandi va tezkor tadbir natijasida ikki shaxs pora bilan qo‘lga tushdi.

Ma’lum bo‘lishicha, avval ham firibgarlik uchun jazoga tortilgan 45 yoshli toshkentlik fuqaro bu safar advokat bilan til biriktirib, katta miqdorda pul qo‘lga kiritishni rejalashtirgan. O‘ziga sherik qilib olgan advokatni esa Ichki ishlar vazirligi Jazoni ijro etish departamentida yuqori lavozimda ishlaydigan shaxs sifatida tanishtirib, jinoiy rejasini amalga oshirishga uringan.

Ular shu yo‘l bilan Buxoro viloyatidagi 1-sonli jazoni ijro etish muassasasida sud hukmi bilan 8 yil 7 oyga ozodlikdan mahrum etilgan mahkumni Toshkent viloyatidagi 7-sonli muassasaga ko‘chirishni va’da qilgan. Bu “xizmat” uchun esa mahkumning yaqinlaridan 5 ming AQSH dollari talab qilingan.

Mahkumning qarindoshlari vaziyatdan shubhalanib, bu bo‘yicha huquqni muhofaza qiluvchi organlarga murojaat qilgan. Tezkor tadbir davomida esa firibgar va uning advokatlik sohasidagi sherigi pul mablag‘larini qo‘lga kiritayotgan paytida dalillar bilan ushlandi.

Hozirda ushbu ikki shaxsga nisbatan O‘zbekiston Respublikasi Jinoyat kodeksining 168-moddasi (firibgarlik) hamda 28, 211-moddalari (pora berishga urinish) bilan jinoyat ishi qo‘zg‘atilgan. Ayni vaqtda ularga nisbatan qamoq ehtiyot chorasi qo‘llanilgan bo‘lib, tergov jarayonlari olib borilmoqda.

Davlat xavfsizlik xizmati va Bosh prokuratura huzuridagi Iqtisodiy jinoyatlarga qarshi kurashish departamenti barcha fuqarolarni ushbu kabi firibgarlik harakatlari qurboniga aylanmaslik uchun ogoh bo‘lishga va har qanday shubhali vaziyatda huquqni muhofaza qiluvchi organlarga zudlik bilan xabar berishga chaqiradi.

Shuningdek, davlat organlari bunday qonunbuzarliklarga qarshi qat’iy kurashishda davom etishini ma’lum qilgan. Bu kabi firibgarliklar ortida turgan shaxslarga nisbatan jazo muqarrar bo‘ladi. “Zamin”ni Telegramʻda oʻqing!