Toshkentda uyda timsoh saqlangani aniqlandi

Poytaxtimiz Toshkent shahrida noodatiy holat qayd etildi — mahalliy fuqaro o‘z uyida Nil deltasiga xos bo‘lgan xavfli hayvon — timsohni saqlab kelayotgani aniqlandi. Bu haqda Ekologiya, atrof muhitni muhofaza qilish va iqlim o‘zgarishi vazirligi rasmiy bayonot berdi.

Ma’lum qilinishicha, fuqaro yashash manzilida 1 dona Nil timsohini noqonuniy ravishda parvarishlab kelgan. Mazkur holat tegishli idoralar tomonidan aniqlangandan so‘ng, Ma’muriy javobgarlik to‘g‘risidagi kodeksning 92-1-moddasi 1-qismi asosida huquqbuzarga nisbatan bayonnoma rasmiylashtirildi.

Ekologik nazoratchilar holat yuzasidan barcha hujjatlarni rasmiylashtirib, sud organlariga yuborganini ma’lum qilishdi. Ayni vaqtda, mazkur holatga huquqiy baho berish va zarur chora ko‘rish ishlari olib borilmoqda.

Shuningdek, aholi xavfsizligini ta’minlash maqsadida timsoh Toshkent hayvonot bog‘iga topshirilgan. Mutasaddilar mazkur hayvonga maxsus sharoitlarda parvarish va kuzatuv tashkil etgan.

Ekolog mutaxassislar bunday holatlarning oldini olish maqsadida fuqarolarni noqonuniy hayvon saqlashdan ogoh etishmoqda. Chunki ekzotik hayvonlar nafaqat qonunbuzarlik, balki inson xavfsizligiga ham jiddiy tahdid soladi.

Zamin.uz ekzotik hayvonlar bilan bog‘liq holatlar yuzasidan yangiliklarni batafsil yoritib borishda davom etadi. “Zamin”ni Telegramʻda oʻqing!