Qamchiq dovoni orqali Toshkent viloyatining Angren shahriga kirish qismida og‘ir yo‘l-transport hodisasi sodir bo‘ldi.
Ijtimoiy tarmoqlarda tarqalayotgan lavhalarda ko‘rinishicha, avtohalokatda neft ortilgan maxsus yuk mashinasi, sement tashigan yana bir yuk mashinasi hamda bir nechta yengil avtomobillar ishtirok etgan. Yo‘lning muayyan qismida transport vositalari yongani ham aks etgan.
Videolardan birida yuk mashinasi kabinasida qolib ketgan odamning qutulib chiqqanini ko‘rish mumkin. Biroq ko‘p o‘tmay ushbu yuk mashinasi to‘liq yonib ketgani ma’lum bo‘ldi.
Yana bir tasvirda esa hodisa oqibatida halok bo‘lganlar borligi aytilgan. Hozirga qadar qurbonlar aniq soni oshkor etilmagan bo‘lsa-da, rasmiy ma’lumotlarga ko‘ra, voqea oqibatida insonlar hayotidan ayrilgani tasdiqlandi.
Toshkent viloyati IIBB bayonotida aytilishicha, holat yuzasidan Jinoyat kodeksining 266-moddasi 3-qismi bilan jinoyat ishi ochilgan. Bu esa ikki yoki undan ortiq shaxs halok bo‘lganini anglatadi. Tergov-surishtiruv ishlari olib borilmoqda.
Hodisa sababli yo‘l harakati butunlay to‘xtab qoldi va ikki yo‘nalishda ham yirik tirbandlik yuzaga keldi.
«Qamchiqavtoyo‘l» telegram-kanalida tarqatilgan ma’lumotga ko‘ra, «Toshkent-Ohangaron-Angren-Qo‘qon-Shahrixon-Andijon» avtomobil yo‘lining 93–94 kilometri oralig‘ida «Toshkent-Vodiy» va «Vodiy-Toshkent» yo‘nalishlarida harakatda uzilishlar kuzatilmoqda.
Ta’kidlanishicha, tegishli tashkilotlar hozirda yo‘l harakatini tiklash va oqibatlarni bartaraf etish ishlarini olib bormoqda.
Shu tariqa, Qamchiq dovonida sodir bo‘lgan yirik avtohalokat nafaqat qurbonlar bilan, balki ko‘plab yo‘lovchilar uchun yo‘lda qiyinchiliklar yuzaga keltirdi. Tergov natijalari esa hodisa sabablarini oydinlashtirishi kutilyapti.
“Zamin”ni Telegramʻda oʻqing!
