O‘zbekistonda oliy ta’lim muassasalariga qabul jarayonida qo‘shimcha tanlov bosqichi e’lon qilindi. Unda umumiy tanlovda 56,7 va undan yuqori ball to‘plagan, biroq qabul qilinmagan yoki test sinovlarida qatnashib, ammo ta’lim yo‘nalishini belgilamagan abituriyentlar ishtirok etishlari mumkin.
Mazkur qo‘shimcha tanlov orqali talabgorlarga 5 tagacha ta’lim yo‘nalishini tanlash imkoniyati yaratilgan. Shu bilan birga, tanlov faqatgina vakant qolgan yo‘nalishlar asosida amalga oshiriladi.
Vakant o‘rinlar ro‘yxatlarida kunduzgi, kechki va masofaviy ta’lim shakllari bo‘yicha qolgan bo‘sh o‘rinlar alohida ko‘rsatilgan. Bu orqali har bir abituriyent o‘z imkoniyatidan kelib chiqib yo‘nalishni belgilashi mumkin.
Tanlovda ishtirok etish uchun so‘nggi muddat — 2025-yil 3-oktyabrgacha. Natijalar esa 2025-yil 8-oktyabrga qadar e’lon qilinishi belgilangan. Barcha batafsil ma’lumotlar my.dtm.uz platformasida taqdim etilmoqda.
Bu imkoniyat o‘z o‘rnini topa olmagan ko‘plab yoshlar uchun yana bir shans sifatida baholanmoqda.
“Zamin”ni Telegramʻda oʻqing!
