Toshkent viloyati aholisi uchun qulay transport imkoniyatlarini kengaytirish maqsadida 12-oktyabrdan boshlab yangi 197-sonli avtobus yo‘nalishi ishga tushirildi. Bu haqda Transport vazirligi matbuot xizmati ma’lum qildi.
Rasmiy ma’lumotga ko‘ra, yo‘l harakati xavfsizligini ta’minlash, infratuzilmani yaxshilash va tirbandliklarni kamaytirish bo‘yicha amalga oshirilayotgan ishlar doirasida Toshkent viloyatining barcha hududlarini poytaxt bilan bog‘lash rejasi izchil davom etmoqda.
Yangi yo‘nalish “O‘zbekiston mehmonxonasi” bekatidan boshlanib, “Yangi Toshkent” bekatigacha harakatlanadi. Ushbu yo‘nalishda zamonaviy va qulay “Yutong” avtobuslari xizmat ko‘rsatadi.
Avtobuslar yo‘lovchilarni har kuni soat 05:30 dan 22:50 gacha tashiydi. Transport vazirligi ma’lumotiga ko‘ra, yo‘nalish aholi uchun ham vaqt, ham masofa jihatidan qulay bo‘lishi kutilmoqda.
Mutasaddilarning ta’kidlashicha, yangi yo‘nalish fuqarolarning kundalik qatnovini yengillashtirish, ijtimoiy faollikni oshirish va shahar atrofidagi hududlarning transport bog‘lanishini yaxshilashda muhim ahamiyat kasb etadi.
Yangi 197-sonli yo‘nalishning ishga tushirilishi poytaxt atrofidagi aholi uchun katta yengillik yaratishi, vaqt tejamkorligini ta’minlashi va jamoat transportidagi xizmat sifatini yangi bosqichga olib chiqishi kutilmoqda.
“Zamin”ni Telegramʻda oʻqing!
