O‘zbekistonda qarzdorlik ortidan necha fuqaro suvdan uzilgani ma’lum qilindi. “O‘zsuvta’minot”ning rasmiy xabariga ko‘ra, joriy yilning yanvar–oktyabr oylarida ichimlik va oqova suv tarmoqlariga 4351 ta noqonuniy ulanish holati aniqlangan. Bu ko‘rsatkichlar mamlakat bo‘ylab suv resurslaridan noqonuniy foydalanish ko‘lami hali ham jiddiy muammo ekanini ko‘rsatadi.
Eng yuqori qonunbuzarliklar Toshkent shahrida qayd etilgan — 488 ta holat. Keyingi o‘rinlarda Sirdaryo viloyati (433 ta), Qoraqalpog‘iston Respublikasi (425 ta) va Xorazm viloyati (419 ta) joy olgan. Ayni holatlar tufayli jamiyat manfaatlariga 82 mlrd so‘mdan ortiq iqtisodiy zarar yetgani hisoblab chiqilgan. Shundan 33,6 mlrd so‘mlik qismning qoplanishi ta’minlangan.
Qarzdorlikni qisqartirish va to‘lov intizomini mustahkamlash maqsadida yil davomida 123,4 ming qarzdor iste’molchi bo‘yicha fuqarolik va iqtisodiy sudlarga 358,4 mlrd so‘mlik da’vo arizalari yuborilgan. Hisobot davrida esa juda jiddiy raqamlar aniqlangan: respublika bo‘yicha 62,4 ming jismoniy va yuridik iste’molchi qarzdorligi tufayli suv ta’minoti tarmog‘idan uzilgan.
Eng yuqori ko‘rsatkich yana poytaxt hissasiga to‘g‘ri kelgan — 46 ming iste’molchi Toshkent shahrida suvdan uzilgan. Bu nafaqat maishiy qulayliklarga ta’sir qilmoqda, balki aholi va tadbirkorlar uchun qo‘shimcha muammolarni keltirib chiqarmoqda.
Shu bilan birga, debitor qarzdorliklar qisqarishi ijobiy natija sifatida qayd etilgan. Joriy yil boshiga nisbatan qarzdorliklar 203 mlrd so‘mga (22%) kamayib, 705,5 mlrd so‘mni tashkil etgan. O‘tgan yilning shu davriga nisbatan esa qarzdorliklar 364 mlrd so‘mga (34%) qisqartirilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
