Toshkentdagi xususiy (nodavlat) bog‘chada bolani kaltaklagan tarbiyachi ishdan bo‘shatildi. Bu haqda “Millar” xabar berdi. Voqea ijtimoiy tarmoqlarda tarqalgan video orqali katta muhokamaga sabab bo‘ldi.
Ma’lum qilinishicha, hodisa joriy yilning 22 yanvar kuni Olmazor tumanida joylashgan “American Daycare” nomli nodavlat maktabgacha ta’lim tashkilotida sodir bo‘lgan. Bog‘cha mas’ullari bolaga qo‘pol munosabatda bo‘lgan tarbiyachi ishdan olinganini bildirgan. Ya’ni muassasa o‘z ichida chora ko‘rgani va vaziyatga befarq qolmagani aytilmoqda.
“Tushlikda uxlamagani uchun bog‘cha opa hamma bola turganidan keyin mening farzandimga nisbatan mana shunaqa qo‘pol harakatlar bilan qo‘l ko‘tarib, burnini qonatgan. Bolamni kiyintirib, yuz-qo‘lini yuvib, yonimga tushirib yuborishganda men bog‘chaga kelgan edim”, degan bolaning onasi. Uning so‘zlariga ko‘ra, holat aynan bola tushlik paytida uxlamagani ortidan kelib chiqqan.
Poytaxt Maktabgacha va maktab ta’limi boshqarmasiga ko‘ra, mazkur holat boshqarma tomonidan o‘rganish jarayonida bo‘lib, o‘rganish natijasidan kelib chiqqan holda qo‘shimcha ma’lumot taqdim etiladi. Demak, rasmiy xulosa chiqqach, yana aniq tafsilotlar berilishi kutilmoqda.
“Zamin”ni Telegramʻda oʻqing!
