Buxoro viloyatida huquq-tartibot idoralari Andijonda tugʻilgan fuqaroni kriptoaktivlar bilan bogʻliq noqonuniy operatsiyalarni juda katta miqdorda amalga oshirganlik gumoni bilan qoʻlga oldi. U avval ham shunga oʻxshash faoliyati uchun javobgarlikka tortilgani aytilmoqda. Bu haqda podrobno.uz xabar beradi.
Ichki ishlar vazirligi matbuot xizmati maʼlumotiga ko‘ra, gumonlanuvchi 2025 yil 20 aprelidan 30 sentyabrigacha Binance va Bitget kriptoplatformalarida tegishli litsenziyasiz 2,4 mingta bitim tuzgan. Aktivlarni qabul qilish, o‘tkazish va ayirboshlash bo‘yicha operatsiyalar hajmi 1 373 824 USDTni tashkil etib, bu 18 milliard so‘mdan oshadi.
Tergov jarayonida mablag‘lar harakatining ikki asosiy yo‘nalishi aniqlangan: tranzaksiyalarni yashirish maqsadida 1 milliard so‘m vositachilarning bank kartalari orqali o‘tkazilgan, yana 757 million so‘m esa gumonlanuvchi nazoratidagi hisob-raqamlarga kelib tushgan. Mablag‘larning yakuniy manzili xorijdagi kriptobirja hamyonlari bo‘lib, pullar u yerga raqamli aktiv ko‘rinishida chiqarib yuborilgani qayd etilgan.
Tintuv vaqtida gumonlanuvchidan mobil telefon olib qo‘yilgan, unda qariyb 15 ta elektron pochta manzili aniqlangan. Binance ilovasini tekshirish natijasida savdo amaliyotlari aynan gumonlanuvchi nomiga rasmiylashtirilgan akkaunt orqali amalga oshirilgani tasdiqlangan.
Qayd etilishicha, mazkur fuqaro 2025 yil avgust oyida kriptovalyuta bo‘yicha 26 milliard so‘mlik noqonuniy operatsiyalar uchun sudlangan. O‘shanda sud aybiga iqror bo‘lganini inobatga olib, unga ozodlikni cheklash jazosi tayinlagan. Tergov versiyasiga ko‘ra, erkak avvalgi sud jarayoni davom etayotgan paytda ham kriptoaktivlar bilan bog‘liq faoliyatini to‘xtatmagan.
Holat yuzasidan Jinoyat kodeksining 278-8-moddasi 3-qismi “a” bandi (kriptoaktivlar muomalasi sohasidagi qonunchilikni juda katta miqdorda buzish) bilan jinoyat ishi qoʻzgʻatilgan. Tergov harakatlari davom etmoqda.
“Zamin”ni Telegramʻda oʻqing!
