Toshkent shahar ma'muriy sudida Hamid Olimjon maydonidagi mashhur 18 qavatli uylar rekonstruksiyasi bilan bog'liq ish bo'yicha apellyatsiya shikoyati ko'rib chiqildi. 2026 yil 28 fevral kuni sud aholining talablarini qanoatlantirmadi va avvalgi qarorni o'z kuchida qoldirdi. Mojaroga sabab bo'layotgan asosiy omil Vazirlar Mahkamasining 2025 yil 7 noyabrdagi 707 sonli yopiq qarori hisoblanadi. Bu haqda anhor.uz xabar beradi.
Eslatib o'tamiz, 2025 yil 13 oktyabrda sakkizta ko'p qavatli uyda yashovchi 220 nafar fuqaro prezident, shahar hokimi va bosh prokurorga murojaat qilgan edi. Aholi binolarning fasad qismini ta'mirlash ishlarini loyiha-smeta hujjatlari tasdiqlanmaguncha to'xtatib turishni talab qilgan. Biroq sud jarayonida hokimiyat vakillari taqdim etgan hujjatlar, xususan, "Yagona buyurtmachi xizmat injiniring kompaniyasi" va "Lauris Decoration Build" MCHJ o'rtasidagi shartnoma hamda yopiq qaror asosida ishlar qonuniy deb topildi.
Aholi vakillarining so'zlariga ko'ra, sud jarayonida "xizmat doirasida foydalanish uchun" (DSP) grifi ostidagi hujjatlar sir tutilgani sababli ular o'z huquqlarini to'liq himoya qila olishmagan. Mazkur yopiq qaror buyurtmachiga elektron savdolarsiz va jamoatchilik muhokamasisiz pudratchini tanlash, shuningdek, ekspertiza xulosalarisiz ham qurilish ishlarini moliyalashtirish huquqini beradi. Aholi esa shaffoflik yo'qligi va me'moriy qiyofaning buzilishi xavfidan xavotirda ekanini ta'kidlamoqda.
“Zamin”ni Telegramʻda oʻqing!
