Fargʻona viloyatida energiya resurslaridan noqonuniy foydalanish bilan bogʻliq bir qator jiddiy qonunbuzarliklar aniqlandi. Bu haqda Bosh prokuratura huzuridagi Departament rasman maʼlum qildi.
Maʼlum boʻlishicha, Rishton tumanida «Z.K.» oilaviy korxonasi rahbari Gʻ.Gʻ. umumiy ovqatlanish shoxobchasida tabiiy gaz tarmogʻiga oʻzboshimchalik bilan ulanib, 164,1 million soʻmlik resursdan noqonuniy foydalangan. Qayd etilishicha, ushbu shaxs avval ham sudlangan boʻlgan.
Bagʻdod tumanida esa yakka tartibdagi tadbirkor «A.D.» noturar binoda elektr tarmogʻiga toʻgʻridan-toʻgʻri ulanib, 134,7 million soʻmlik elektr energiyasini qonunga xilof ravishda ishlatgani fosh etildi.
Shuningdek, Fargʻona tumanida oʻtkazilgan tezkor tadbirda «Q.S.» MCHJ masʼul shaxslari ham qonunbuzarlikka yoʻl qoʻygani maʼlum boʻldi. Ular «Nurafshon» MFYda joylashgan doʻkonda umumiy elektr tarmogʻiga noqonuniy ulanib, 118 million soʻmlik energiyadan foydalangan.
Barcha holatlarda energiya resurslari tijorat maqsadlarida ishlatilgani qayd etilmoqda. Ushbu holatlar yuzasidan Jinoyat kodeksining 169-moddasi — oʻgʻrilik boʻyicha jinoyat ishlari qoʻzgʻatilgan va hozirda tergov harakatlari davom etmoqda.
Qisqacha aytganda, “bepul energiya” degan narsa yoʻq — oxiri baribir chiqib keladi. Qonun esa bunday holatlarda qattiq ishlaydi.
“Zamin”ni Telegramʻda oʻqing!
