Navoiy viloyatining Karmana tumanida maktab oʻquvchilari ishtirokida yuz bergan yoʻl-transport hodisasi jamoatchilik orasida jiddiy muhokamalarga sabab boʻlmoqda. Ushbu fojiali voqea haqida viloyat IIB YHXB axborot xizmati rasman maʼlumot taqdim etdi.
Dastlabki maʼlumotlarga koʻra, hodisa 22 aprel kuni taxminan soat 21:00 lar atrofida tumanning Malik mahallasi hududida sodir boʻlgan. Aniqlanishicha, Hazora qishlogʻida joylashgan 22-umumtaʼlim maktabining ikki nafar oʻquvchisi boʻlgan Cobalt rusumli yengil avtomobil boshqaruvni yoʻqotib, yoʻl chetidan chiqib ketgan.
Afsuski, ushbu yoʻl-transport hodisasi ogʻir oqibatlar bilan yakunlangan. 9-sinf oʻquvchisi I.H. ogʻir jarohatlar tufayli shifoxonada vafot etgan. U bilan birga boʻlgan 11-sinf oʻquvchisi esa turli darajadagi tan jarohatlari bilan tibbiy muassasaga yotqizilgan va hozirda shifokorlar nazorati ostida davolanmoqda.
Mazkur holatdan soʻng Navoiy viloyati IIB YHXB tomonidan maktabda yuqori sinf oʻquvchilari ishtirokida maxsus tushuntirish va muhokama yigʻilishi tashkil etildi. Unda yoshlar oʻrtasida yoʻl harakati qoidalariga rioya qilish, transport vositalarini boshqarishda masʼuliyat va ehtiyotkorlik masalalariga alohida eʼtibor qaratildi.
Qoʻshimcha manbalarga koʻra, ushbu avtomashina jarohat olgan oʻquvchining otasiga tegishli boʻlgan. Biroq u rulni boshqa shaxsga berganini maʼlum qilgan. Hozirda aynan kim transport vositasini boshqarganini aniqlash maqsadida ekspertiza tayinlanishi mumkinligi aytilmoqda.
Bu kabi hodisalar yana bir bor yoʻllarda xavfsizlik qoidalariga qatʼiy amal qilish zarurligini eslatadi. Ayniqsa, voyaga yetmaganlar tomonidan transport vositasini boshqarish juda katta xavf tugʻdirishi, qaygʻuli oqibatlarga olib kelishi mumkin.
“Zamin”ni Telegramʻda oʻqing!
