Toshkent viloyatida keng muhokamaga sabab boʻlgan holat yuzasidan rasmiy munosabat bildirildi. Toshkent viloyati IIBB axborot xizmati tarqatgan bayonotga koʻra, PPX xodimi bilan bogʻliq ravishda ijtimoiy tarmoqlarda tarqalgan maʼlumotlar tekshiruv davomida oʻz tasdigʻini topmagan.
Rasmiy maʼlumotga koʻra, voqea joriy yil 27 aprel kuni tungi soat 00:40 atrofida sodir boʻlgan. Ohangaron shahrida xizmat olib borayotgan PPX xodimiga uning tanishi — 22 yoshli A.K. (ayol) telefon orqali murojaat qilib, maslahat zarurligini bildirgan va uchrashuvga chaqirgan.
Xodim belgilangan joyga yetib borgach, A.K. va uning 14 yoshli tanishi uning avtomashinasiga oʻtirgan. Shu vaqtda 18 yoshli A.X. (videomurojaat muallifi) yana toʻrt nafar tanishlari bilan kelib, xodimga nisbatan haqoratli soʻzlar aytgan va janjal keltirib chiqargan. Taʼkidlanishicha, mazkur shaxs 14 yoshli qiz bilan qarindoshlik aloqasiga ega emas.
Idora qayd etishicha, holatda voyaga yetmagan shaxs ishtirok etgani sababli barcha tafsilotlar ochiqlanmayapti va tekshiruv jarayonlari qonuniy tartibda davom etmoqda.
Shu bilan birga, rasmiylar tekshiruv yakuniga koʻra yolgʻon maʼlumot tarqatgan shaxslarga nisbatan maʼmuriy choralar koʻrilishi, agar bu harakatlar ogʻir oqibatlarga sabab boʻlgan boʻlsa, jinoiy javobgarlik ham qoʻllanilishi mumkinligini taʼkidladi.
Eslatib oʻtamiz, avvalroq ushbu holat boʻyicha turli xabarlar tarqalgan va IIV Jamoat xavfsizligi departamenti tekshiruv boshlanganini, xodim vaqtincha xizmatdan chetlashtirilganini maʼlum qilgan edi.
Qisqasi, holat yuzasidan aniq xulosa hali chiqarilmagan. Rasmiy tekshiruv natijalari eʼlon qilinguniga qadar tarqatilayotgan maʼlumotlarga ehtiyotkorlik bilan yondashish tavsiya etilmoqda.
“Zamin”ni Telegramʻda oʻqing!
