Aqto‘beda halok bo‘lganlarning 30 nafarining shaxsi aniqlandi

Bugun, 18 yanvar kuni Qozog‘istonning Aqto‘be viloyatida sodir bo‘lgan fojia sabablarini o‘rganish uchun O‘zbekiston prezidenti topshirig‘iga ko‘ra bosh vazir Abdulla Aripov boshchiligida tashkil etilgan Maxsus hukumat komissiyasi ayni vaqtda Qozog‘istonda bo‘lib turibdi.

Maxsus komissiya tarkibidagi manba Kun.uz nashriga ma’lum qilishicha, ayni vaqtda avtobus yonib ketishi oqibatida halok bo‘lgan 52 kishidan 30 nafarining shaxsi aniqlangan. Yaqin vaqtlar ichida shaxsni aniqlash ishlari yakunlanib, marhumlarning ro‘yxati e’lon qilinishi kutilmoqda.

Bundan avvalroq halokatdan omon qolgan 5 kishidan ikki nafari O‘zbekiston fuqarolari ekani ma’lum bo‘lgandi.

Ayni vaqtga kelib ularning shaxsi aniqlangan. Ular 1988 yilda tug‘ilgan Ahror Isakov va 1980 yilda tug‘ilgan Isroiljon Mirzaahmedov bo‘lib, ularning ikkisi ham Namangan viloyatida istiqomat qilishadi. “Zamin”ni Telegramʻda oʻqing!