«Niqob bor. Bepul. Duoga». Farg‘onada tibbiyot niqoblari bepul tarqatilmoqda (foto)

^{Foto: «Daryo»}
Farg‘onadagi dorixonalarda tibbiyot niqoblari aholiga bepul tarqatilmoqda. Bu haqda «Daryo» muxbiri Azizjon Ermatov xabar berdi.
Ma’lum bo‘lishicha, Buvayda tumani markazida joylashgan «Qalb shifo farm» dorixonasi rahbari Sirojiddin Turg‘unov «Virusni yengish uchun birlashamiz!» aksiyasini boshlagan va aholiga yordam tariqasida bepul tibbiy niqob tarqatmoqda.

^{Foto: «Daryo»}
Aksiyaga Dang‘ara tumanidagi «Ayubxon tekstil» korxonasi ham qo‘shilgan.

^{Foto: «Daryo»}
Korxona rahbari Dilshoda Usmonovaning ta’kidlashicha, «Ayubxon tekstil»da asosan erkaklar uchun kiyim-kechak va paypoq ishlab chiqariladi. Koronavirus sabab tibbiyot niqoblariga bo‘lgan talab oshgani bois, ayni paytda korxonada tibbiyot niqoblari ham ishlab chiqarilib, dorixonalarga 500 so‘mdan yetkazib berilmoqda. Bundan tashqari, tuman markazida maxsus savdo rastasi tashkil etilib, aholiga tibbiy niqoblar bepul tarqatilmoqda.

^{Foto: «Daryo»}
Bag‘dod tumani markazida joylashgan «Konizar farm» dorixonasida ham bepul tibbiy niqoblar tarqatish boshlangan. Tadbirkor Muxtorjon Ochildiyevning ma’lum qilishicha, 16 martdan beri har kuni Qo‘qon shahridan tibbiy niqob keltirib, bepul tarqatmoqda.

^{Foto: «Daryo»}
Aniqlanishicha, mazkur aksiya viloyatning Furqat, O‘zbekiston va Bag‘dod tumanlarida ham o‘tkazilmoqda.

^{Foto: «Daryo»}
Eslatib o‘tamiz, respublikadagi dorixonalarda tibbiyot niqoblari taqchilligi yuzaga kelgach,«O‘zto‘qimachiliksanoat» assotsiatsiyasi bunga javoban, O‘zbekistonda kuniga 500 ming dona tibbiy niqob ishlab chiqarilayotganini, ularning soni 2 milliontaga yetkazilishini ta’kidlagandi.