Qiymati 462 million so‘mlik tamaki va biologik faol qo‘shimchalarning noqonuniy alanmasiga chek qo‘yildi

Davlatimiz tomonidan tadbirkorlarga erkinlik va qulay shart-sharoitlar yaratib berilishiga qaramay, noqonuniy yo‘llar bilan daromad topishni afzal bilayotgan ayrim fuqarolar hamon uchrab turibdi.

Mo‘may pul topishni o‘ziga kasb qilib olgan qonunbuzarlarning qing‘ir harakatlariga chek qo‘yish maqsadida bojxona organlari tomonidan muntazam ravishda tezkor tadbirlar o‘tkazib kelinmoqda.

Yaqinda Toshkent viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan tezkor tadbir o‘tkazildi.

Tadbir davomida “Farg‘ona-Toshkent” yo‘nalishi bo‘yicha harakatlanib ketayotgan, fuqaro I.R. boshqaruvidagi “KIA BONGO III” rusumli yuk avtoulovi Toshkent viloyati Ohangaron tumanida to‘xtatilib, xolislar ishtirokida ko‘zdan kechirildi.

Natijada, avtomashinada hech qanday hujjatlari bo‘lmagan turli nomdagi 160 million so‘mlik 14 000 quti tamaki mahsulotlari hamda 130 million so‘mlik 694 dona parfyumeriya mahsulotlari borligi aniqlandi.
Shundan so‘ng, tezkor tadbir davom ettirilib, fuqaro X.I.ning Toshkent shahar Uchtepa tumanida joylashgan uyi xolislar ishtirokida ko‘zdan kechirildi.

Natijada, ushbu shaxs o‘z yashash uyida xorijda ishlab chiqarilgan va hech qanday xujjatlari bo‘lmagan, aksiz markalari bilan markalanmagan umumiy qiymati 58,6 million so‘mlik 2780 quti tamaki mahsulotlari, 109 million so‘mlik 1625 dona “Herbalife” nomli biologik faol qo‘shimchalar, 4,1 million so‘mlik tozalash vositalari va yondirgichlarni noqonuniy ravishda saqlayotganligi fosh bo‘ldi.

O‘tkazilgan tezkor tadbirlar davomida qonunbuzarlardan 5 turdagi umumiy qiymati 461,6 million so‘mlik tovar moddiy boyliklar ashyoviy dalil sifatida olindi.
Hozirda ushbu holat yuzasidan bojxona organlari tomonidan surishtiruv harakatlari davom ettirilmoqda. “Zamin” yangiliklarini “Youtube”da kuzatib boring