21:00 / 27.01.2021
1 155

Surxondaryoda YPX xodimi boshqaruvidagi somon ortilgan yuk mashinasi ag‘darilib ketdi

Surxondaryoda YPX xodimi boshqaruvidagi somon ortilgan yuk mashinasi ag‘darilib ketdi
Foto: YHXBB matbuot xizmati
Surxondaryo viloyatining Sho‘rchi tumanida somon ortilgan «ZIL» ag‘darilib ketgani aks etgan video ijtimoiy tarmoqlarda tarqaldi. Unda yuk mashinasini YPX xodimi boshqargani aytilgan.

YHXBB matbuot xizmatining ma’lum qilishicha, voqea 26 yanvar kuni soat 08:30 larda yuz bergan. Shu kuni belgilangan taqsimot asosida Surxondaryo viloyati IIB YHXB YPX xodimi J.Normurodov Sho‘rchi tumani hududiga xizmatga jalb etilgan. Xizmati davomida tuman hududida joylashgan «Chavandoz» savdo majmuasi yaqinida «Sho‘rchi-Denov» yo‘nalishida yuk tashish qoidalarini buzib harakatlanib kelgan «Gaz-53» rusumli yuk mashinasini to‘xtatgan.

Sodir etgan qoidabuzarligini tushuntirib, hujjatlarini taqdim etishini so‘ragan vaqtida haydovchi YPX xodimiga me’yoriy hujjatlarini taqdim etmagan.

YPX xodimi belgilangan tartibda ma’muriy bayonnoma rasmiylashtirib, transport vositasini vaqtincha saqlash uchun jarima maydonchasiga boshqarib olib ketayotgan vaqtda Sho‘rchi tumani, Amir Temur va Mustaqillik ko‘chalari kesishgan chorrahada Nexia bilan to‘qnashmaslik uchun rulni o‘ng tomonga burib yuborgani sababli yuk avtomobili ag‘darilgan. Ag‘darilish vaqtida Nexia’ning old qismiga shikast yetgan.

YTH oqibatida tan jarohati olganlar yo‘q. Holat yuzasidan Sho‘rchi tumani prokuraturasi tomonidan surishtiruv ishlari olib borilmoqda.
Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)