Shavkat Mirziyoyev vaksina ishlab chiqarilishi kutilayotgan Jurabek Laboratories qo‘shma korxonasi faoliyati bilan tanishdi

^{Foto: Prezident matbuot xizmati}
Prezident Shavkat Mirziyoyev Olmaliq shahridagi Jurabek Laboratories qo‘shma korxonasi faoliyatini ko‘zdan kechirdi.
Korxona 48 million flakon infuzion eritma, 480 million dona ampula, 60 million dona quruq antibiotik, 20 million dona liofilizatsiya qilingan dori shakllarini ishlab chiqarish quvvatiga ega.

Bu yerda GLP laboratoriyasi mavjud, xalqaro GMP standarti joriy etilgan. Korxona tomonidan 300 turdan ortiq dori vositalari davlat ro‘yxatidan o‘tkazilgan. 15 dan ortiq xorijiy davlatga eksport qilinmoqda.

^{Foto: Prezident matbuot xizmati}
Bugungi pandemiya davrida juda muhim bo‘lgan remdesivir, favipiravir, geparin, enoksaparin kabi dorilar ham ishlab chiqarilmoqda.

Biotexnologiyalar sohasida monoklonial antitanalar turidagi dori vositalarini ishlab chiqarish bo‘yicha 30 million dollarlik yangi loyihaga kirishilgan.

^{Foto: Prezident matbuot xizmati}
Korxonada koronavirusga qarshi vaksina ishlab chiqarish mo‘ljallanmoqda. Davlat rahbari shu boradagi texnik imkoniyatlar bilan tanishdi.