23:26 / 25.11.2021
1 204

Abu Ali ibn Sino va COVID–2019

Abu Ali ibn Sino va COVID–2019
Foto: Xalq so‘zi
Buxoroda an’anaviy XI xalqaro Abu Ali ibn Sino o‘qishlari boshlandi. Buyuk tabib, olim va faylasufning insoniyatga qoldirgan boy ma’naviy merosini chuqur o‘rganish va keng targ‘ib qilish, dunyo ahlini, jumladan, yoshlarni jahon tibbiyoti ravnaqiga beqiyos hissa qo‘shgan bu ulug‘ ajdodimiz hayoti, faoliyati bilan atroflicha tanishtirish kabi xayrli maqsadlarni o‘z oldiga qo‘ygan mazkur tadbir Ibn Sino nomidagi jamoat fondi, Buxoro viloyati hokimligi, Sog‘liqni saqlash vazirligi hamda alloma nomi bilan ataluvchi Buxoro davlat tibbiyot instituti hamkorligida o‘tkazilmoqda.

Tadbirda Xitoy, Janubiy Koreya, Isroil, Germaniya, Eron, Rossiya kabi qator davlatlar vakillari, mamlakatimiz tibbiyot va tabobat sohasining yetuk olim — mutaxassislari ishtirok etishyapti.Bu galgi o‘qishlar “Abu Ali ibn Sino va COVID-2019” deya nomlandi.

An’anaga muvofiq, ilmiy — amaliy anjuman qatnashchilari bugun tib ilmining sultoni tug‘ilgan Afshona qishlog‘ini ziyorat qildilar, uning haykali poyiga gullar qo‘ydilar. Ibn Sino nomidagi muzeyda bo‘ldilar.

— Shunday nufuzli anjumanda qatnashayotganimdan baxtiyorman, - deydi O‘zbekiston — Koreya xalq tabobati markazi eksperti Yongil Song. — Bu yerda hamkasblarimiz bilan o‘zaro tajriba almashyapmiz. Ibn Sino ta’limotining mazmun — mohiyatiga oid bilim va tushunchalarimizni boyityapmiz.Ushbu saboqlar pirovardida odamlar salomatligini muhofaza etishda qo‘l keladi, albatta.

Tadbir dasturi doirasida Buxoro davlat universitetida xorijiy olim va shifokorlar tomonidan mahorat saboqlari o‘tkazildi.Unda buyuk ajdodimizning qo‘lyozmalaridan tortib zamonaviy tibbiyot masalalarigacha qamrab olindi. Yoshlar markazida esa matbuot anjumani hamda sohaning yetuk mutaxassislari ishtirokida sog‘lom turmush tarzi mavzuida davra suhbati tashkil etildi.

An’anaviy Ibn Sino o‘qishlarining asosiy tadbirlari ertaga ham davom etadi.

Istam IBROHIMOV


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Jamiyat » Abu Ali ibn Sino va COVID–2019