Oliy sud ham Yulduz Usmonovaning «Xasta boʻlma» she'ri boʻyicha shikoyatini qanoatlantirishni rad etdi

Shoir Yoʻlchi Roʻziev va Yulduz Usmonova oʻrtasidagi mualliflik huquqiga doir ish Oliy sudda ham koʻrib chiqildi. Bu haqda Qonunchilik palatasi deputati Rasul Kusherbaev xabar qildi.

Qayd etilishicha, ish da'vogar Yoʻlchi Roʻziev foydasiga hal etilib, Yulduz Usmonovaning shikoyatini qanoatlantirish rad etilgan.

Eslatib oʻtamiz, shoir Yoʻlchi Roʻziev Yulduz Usmonovadan «Xasta boʻlma» she'ri uchun 3 yildan buyon qalam haqini ololmayotgani haqida xabar berilgandi. Toshkent shahar sudlarining ma'lum qilishicha, 2021 yilning 20 sentyabr kuni Fuqarolik ishlari boʻyicha Mirzo Ulugʻbek tumanlararo sudiga «Xasta boʻlma» qoʻshigʻining she'r muallifidan mualliflik huquqlari buzilishiga chek qoʻyish, mualliflik huquqlari buzilgani uchun tovon puli va ma'naviy zarar undirish haqidagi da'vo arizasi kelib tushgan.

Mazkur da'vo arizasi boʻyicha fuqarolik ishi qoʻzgʻatilgan. 29 oktyabr kuni qabul qilingan hal qiluv qarori bilan da'vo ariza qisman qanoatlantirilib, Yulduz Usmonovadan da'vogar Yoʻlchi Roʻzievga 50 million soʻm ma'naviy zarar uchun kompensatsiya, bazaviy hisoblash miqdorining 500 barobar miqdorida (135 million soʻm) etkazilgan zarar hisobiga tovon puli undirish belgilangan.

Keyinchalik 18 yanvar kuni Fuqarolik ishlari boʻyicha Toshkent shahar sudida Yulduz Usmonovaning tuman sudi qarori boʻyicha shikoyat apellyatsiyasi koʻrib chiqilgan. Sud ajrimiga koʻra, 29 oktyabrdagi hal qiluv qarori oʻzgarishsiz, apellyatsiya shikoyati qanoatlantirilmasdan qoldirilgan.

Shoir Yoʻlchi Roʻziev Oʻzbekiston xalq artisti Yulduz Usmonovaning «Xasta boʻlma» hamda «Sevgi izhori» qoʻshiqlari matni muallifi hisoblanadi. Yulduz Usmonova «Xasta boʻlma» qoʻshigʻi matniga qalam haqi sifatida shoirning she'riy toʻplami chop etilishiga koʻmaklashishga va'da bergan. Biroq Yoʻlchi Roʻziev bir necha yillardan buyon san'atkordan she'ri uchun qalam haqini ololmayapti. “Zamin” yangiliklarini “Telegram”da kuzatib boring